Алматылық оқушыларға 17 профориентациялық лагерь ашылды
Алматыда оқушыларды жазғы демалыспен қамту биыл ерекше ұйымдастырылды, деп хабарлайды 24kz.
Қаладағы жалпы білім беретін екі мектепте этнолагерь ашылса, 8 мектептің жанынан құрылған лагерьдің бағдарламасында спорттық ойындарға басымдық берілген. Сонымен бірге мамандық таңдауға бағыттайтын кәсіптік лагерьлер де алматылық оқушыларға есігін ашты.
Құрт жаю, бауырсақ пісіру, жүн түтіп, киіз басу – осының бәрі Жетісу ауданындағы №57 мектептің жаныннан ашылған жазғы лагерьде оқушылардың қатысуымен жасалады. Ұлттық спорттық ойындарға да балалардың қызығушылығы ерекше. Мұндай форматтағы лагерь ұйымдастыруға ата-аналар өтініш білдірген.
Гүлбану Тәуекелова, №57 жалпы білім беретін мектеп директоры:
- Мақсаты – қазақ халқының ұмытылып бара жатқан салт-дәстүрлерін өскелең ұрпағымызға дәріптеу, насихаттау, соларды бойына сіңіре білу, яғни бойына отаншылдықты қалыптастыру. Сонымен қатар жалпы барлық тәлім-тәрбиемізді танымдық үлгілерімізді осы салт-дәстүрлеріміз арқылы жас бүлдіршіндердің бойына дарыту болып табылады.
Биылғы тағы бір ерекшелік – балалар демалысын белсенді өткізу үшін қаладағы сегіз мектепте спорттық лагерьлер ашылды. Ал, №153 мектептің жазғы демалыс бағдарламасы дұрыс тамақтануды негізге алыпты. Сондай-ақ Алматы технологиялық колледжінде қала мектептерінің 8-сынып оқушылары аспаздық бойынша шеберлік сабақтарын өтуде.
Ләззат Жылқыбаева, білім басқармасының басшысы:
- Алматы қаласында 20 мемлекеттік колледж бар. Соның 17-сінде профориентациялық лагерьлер ашылды. Бұл деген сөз, балалар өздерінің қызығушылығына қарай қай мамандықты таңдайды, соны ертерек барып танысуға, сол жерде сол мамандық туралы қосымша үйірмелер ашылды, соған қатысып, мамандықты ертерек таңдауына, ертерек білуіне мүмкіншілік береді.
Алатау ауданында ашылған оқушылардың инновациялық шығармашылық орталығында алматылық балалар үш ай бойы көркемсурет студиясы, вокал және эстрада, спорт, робототехника, мобилография сияқты үйірмелерге тегін қатыса алады.
Авторлары: Гүлжан Көленқызы, Эдуард Кон