Елімізде онлайн құрбандық шалуға арналған сайт іске қосылды

Құрбан айт жақындап қалды. Осы орайда елде онлайн құрбандық шалуға арналған сайт іске қосылды, деп хабарлайды 24kz.

Бүгіннен бастап тұрғындар мал шалуға немесе құрбан етін алуға өтініш қалдыра алады. Ол qurban2024.kz қосымшасы арқылы жүзеге асады. Сайтта белгіленген баға бойынша қойдың құны 75 мың теңге, ал ірі қара 490 мың теңге. Қазақстан мұсылмандары діни басқармасының айтуынша, қой мен ешкіні жеке адам, ал ірі қара мен түйені бір немесе жеті адам бірігіп шала алады. Сондай-ақ елде онлайн құрбан шалуға 800-ге жуық қасапшы дайындықтан өткен.

Наурызбай қажы Тағанұлы, ҚМДБ төрағасы, Бас мүфти:

- Жалпы онлайн деген сөз – қазіргі замандағы қолданыстағы терминдік сөз. Бұл өкілдік құрбандық дейді. Мысалы бір кісі өзі баруға мүмкіндігі жоқ құрбандық шалуға, уақыты жоқ. Бұл кісі өзінің сенімді бір адамына: «мінекей, қаражатты мен саған берейін, сіз менің орныма құрбандық шалсаңыз» дейді. Сөйтіп, ол кісі өкілдікті алып, аманатты алып, бәленше кісінің атынан құрбандық шалады. Бұл шариғатымызда рұқсат етілген.