Жезқазғанда 2025 жылы жаңа спорт нысаны қолданысқа беріледі

Жезқазғанда ескек есушілерге арналған жаңа ғимарат салынып жатыр, деп хабарлайды 24kz.

Өйткені осындағы Кеңгір өзенінің бойында талай чемпиондар шыққан. Жаңа нысан байдарка мен каноэ спортынан олимпиадалық резерв дайындайтын мектепке беріледі.

Ал қазіргі қолданыстағы ғимарат тозып тұр. Сол себепті спортшылардың дайындығы қиындап кеткен. Ал жаңа оқу-жаттығу ғимараты келер жылы пайдалануға беріледі.

Спорт мектебінің қазіргі базасы 40 жыл бұрын қолданысқа берілген. Арагідік жөндеу жасалғанымен, заман талабына сай емес. Жылу мен су жүйесі тартылмаған. Сондықтан оқушылар мұнда тек жазда ғана жаттығады. Оған қоса, бұл мектепте оқығысы келетін балалардың саны жыл санап артып, ғимарат тарлық ете бастаған.

Константин Уткин, Байдарка мен каноэда есу спорты мектебінің директоры:

- Ғимаратта жаттығу жасауға толық жағдай жасалмаған. Бірнеше жыл бұрын жүргізілген кәріз жүйесі жарылып, біраз әуреге түстік. Ауа тазарту қондырғысы да жоқ. Сондықтан спортшыларды бір мезгілде жинай алмаймыз.

Қос қабатты жаңа ғимараттың құрылысына 1 млрд теңге жұмасалады. Мердігер ұйым қазір жерді тегістеу жұмыстарын жүргізіп жатыр. Жаңа базада физикалық жаттығу залы, жуыну бөлмесі, теориялық сабақтар өтетін арнайы кабинеттер қарастырылған.

Жанас Үмбетжанов, Құрылыс басқармасының бөлім басшысы:

- Жобаны қаржыландыру бойынша алғашқы кезеңге 300 млн теңге бөлінді. Құрылыс жұмыстары жоспар бойынша 1 жыл ішінде аяқталады. Мердігер ұйым жұмысқа кірісті. Сәтін салса, 2025 жылдың сәуір айында қолданысқа беріледі.

Спорт мектебінде 300-ден астам бала жаттығады. Бірнешеуі спорт шеберлігіне үміткер. Солардың бірі – Вячеслав Салов. Ересектер арасында әлем чемпионатына қатысып үлгерген ол: «ғимаратымыз жаңарса бұдан да үздік нәтиже көрсетеміз», дейді.

Вячеслав Салов, Байдарка мен каноэда есу спорты мектебінің оқушысы

- Жаңа ғимараттың салынатынын естіп қуанып жатырмыз. Бұл мәселе көптен бері айтылып жүрген еді. Жаңа базада қысы-жазы жаттығуға мүмкіндік болады.

Жезқазған байдарка мен каноэда ескек есу мектебінде көптеген үздік спортшылар өсіп шыққан. Ұлттық құраманың бас бапкері, 4 мәрте Олимпиада ойындарының қатысушысы Қайсар Нұрмағамбетов осы мектептің түлегі.

Авторлары: Елдос Кәкенов, Нұрбол Үздікбаев