FlyArystan жолаушылары жүйедегі ақау кесірінен рейске кешікті
FlyArystan әуе компаниясының қызметіне жүгінген жолаушылар жүйедегі техникалық ақау кесірінен бүгін әуе рейсіне кешігіп қалды, деп хабарлайды 24KZ.
Таңғы сағат 9-дан 5 минут кеткенде Алматыдан Астанаға ұшуы керек бағыт 20 минутқа кешіктірілген. Алайда жолаушыларға жолданған ескерту хабарламасында ұшу уақыты 10:55-ке ауыстырылғаны туралы қате ақпарат көрсетілген. Салдарынан азаматтар рейске кешігіп қалған. Қолайсыздыққа байланысты FlyArystan әуе компаниясының өкілдері жолаушылардан кешірім сұрайды. Астанаға уақытылы жете алмағандарға қаржысы қайтарылады немесе келесі рейстерге қайта брондау мүмкіндігі тегін беріледі. Өтемақы ретінде әуекомпания билеттеріне тағы 50 мың теңге көлемінде ваучерлер ұсынылады. Қазір орталық қызметкерлері жолаушылармен байланысып жатыр.