Қарағанды облысы Центральное ауылындағы спорт нысаны жаңғыртылып жатыр

Қарағанды облысы Бұқар жырау ауданының Центральное ауылында бұған дейін жабылып қалған спорт нысаны қайта жаңғыртылып жатыр, деп хабарлайды 24kz.

Соңғы жылдары ауданда бұқаралық спорт дамып келеді. Мамандардың айтуынша, салаға мемлекет тарапынан қолдау бар.

Руслан Нұрланұлы, тілші:

- Юрий Жауров – ауылдың байырғы тұрғыны. 1987 жылы теңіз флотынан әскерден келген соң тепсе темір үзетін жігіт осы спорт залда дайындалыпты. Тіпті біраз жыл жаттықтырушы да болып жұмыс істеген. Мұнда талай жас жаттығып, жетістікке жетіпті. «Түрлі жарыстар ұйымдастырылып, талай турнир өттті», - дейді ол.

Юрий Жауров, ауыл тұрғыны:

- 2000 жылға қарай экономикалық тоқырау кезінде спорт залымыз жабылып қалды. Себебі оны ұстап тұруға қаражат мүмкіншілігі болмады. Нысан әбден тозып кеткен еді. Кейінгі жылдары біз осы залды қайта күрделі жөндеуден өткізу мәселесін көтеріп жүрдік. Аудан басшылығы ескеріп, міне, қаражат бөліп отыр. Жастарымызды салауатты өмірге баулу үшін осындай орта қалыптастыратын жерлер ауадай қажет.

Спорт залды жөндеуге аудандық бюджеттен 158 миллион теңге қарастырылған. Құрылыс жұмыстары қыркүйектің соңына дейін бітуі тиіс. Мұнда күрес, футбол, баскетбол, волейбол, үстел теннисі сынды көптеген үйірме жұмыс істейтін болады. Бүгінде ауылда 1500 тұрғын бар.

Нұрбол Бөпежанов, Центральное ауылдық округінің әкімі:

- Жоспар бойынша енді бұл жерде 10 шақты тренер болады. Бір 15 адамға жұмыс орындары ашылады. Біздің жастар өте талантты, көздері жанып, көп сайыстарда орындар алып жүр. Спорт шебері болған көп балалар бар.

Халық денсаулығын жақсарту үшін бұқаралық спортты дамыту туралы Мемлекет басшысының тапсырмасына сәйкес Бұқар жырау ауданында соңғы екі-үш жылда біраз жұмыс атқарылды. Бүгінде ауданда 127 спорт нысаны жұмыс істеп тұр. Биыл бір ауылда хоккей корты, екі ауылда футбол алаңы салынды. Тағы екі елді мекенде әмбебап спорт кешенінің құрылысы жүріп жатыр. Аудан бойынша тұрғындардың 44%-і бұқаралық спортқа ден қойған.

Авторлары: Руслан Нұрланұлы, Сайлау Игіліков, Зарина Зұлпыхар