Астанада «Мерейлі отбасы» байқауының жеңімпаздары анықталды
Астанада «Мерейлі отбасы» ұлттық байқауының жеңімпаздарын марапаттау рәсімі өтіп жатыр, деп хабарлайды 24kz.
Шараға сан салада табысты еңбек ететін және қоғамдық-саяси өмірге белсене атсалысып жүрген әулеттер келді. Дәл қазір гала-концерттен арна тілшісі Еркебұлан Смадияров тікелей байланысқа шығып тұр.
Еркебұлан Смадияров, тілші:
- Ұлттық байқаудың марапаттау рәсімі ерекше өтіп жатыр. Жаңа ғана кеш меймандары қызыл кілем үстімен жүріп өтті. Кейін гала-концерттің шымылдығы түрілді. Қатысушылардың көңіл-күйі көтеріңкі. Өйткені бүгін жай ғана байқау емес, айшықты мереке. «Мерейлі отбасы» жобасы жылдан жылға көпшіліктің қызығушылығын арттырып келеді. Биыл 3369 өтінім түскен. Алдыңғы жылдармен салыстырғанда әлдеқайда көбейгені байқалады.
Сандарды сөйлетсек, биыл байқауға Қарағанды, Жетісу облыстары мен Астана, Алматы қалаларынан өтінім көп түскен екен. Қатысушылардың барлығы сан салада табысты еңбек ететін және қоғамдық-саяси өмірге белсене атсалысып жүрген жандар. Байқау қорытындысы туралы алдағы уақытта тағы айта жатамыз.