Шымбұлақ түркі елдеріндегі жетекші тау курорттарының бірі атанды
«Шымбұлақ» тау шаңғы курорты түркі елдеріндегі жетекші демалыс орындарының бірі атанды.
Ыстанбұлда өткен жиында Түркі елдері тау курорттары одағын құру бойынша келісімге қол қойылған. Үздіктер қатарында Әзербайжанның «Шахдаг», Түркияның «Улудаг», Өзбекстанның «Амирсой» және отандық «Шымбұлақ» бар. Бұл тізімдегі курорттар жыл сайын 5 млн-нан астам турист қабылдайды. Сондықтан одақ бұл демалыс орындарын байланыстыратын бағыттар құрастырып, іс-шаралар күнтізбесін бекітуді және тәжірибе алмасып, қысқы спорт түрлерін дамытуды көздеп отыр. Сонымен қатар түркі елдерінің басқа да курорттарын қамту жоспарланған. Осылайша, бұл демалыс орындарын әлемдік нарыққа шығарып, қызмет көрсету сапасы мен туристерге ұсынылатын өнімдердің санын көтермек.