«KAZAKHMYS» құрамасы мини-футболдан чемпионатта қола жүлдегер атанды

«KAZAKHMYS» құрамасы мини-футболдан халықаралық чемпионатта қола жүлдеге ие болды.

Бүгін спортшылар Түркияда өткен Euro Business Cup турнирінен оралды. Жүлдегерлерді Астана әуежайынан күтіп алған әріптесім Бақыт Топтаева тақырыпты жалғайды.  

Қазанның 12 мен 16 аралығында өткен турнирге ұзын саны 28 команда қатысты. «KAZAKHMYS» құрамасы ә дегеннен топтық кезеңде Түркия, Өзбекстан мен Румыния командасын басып озған. Бұдан кейін Словакия футболшыларын 4:3 есебімен ұтып, ширек финалға шықты. Ал мұнда 2:0 есебімен молдовалық команданы қапы қалдырды. Тек жартылай сында Әзербайжан құрамасына 1 ұпайға есе жіберді. Ойын нәтижесінде «KAZAKHMYS» аяқдопшылары қоланы еншіледі.

Нұрасыл Әбдірәшитов, «KAZAKHMYS» командасының мүшесі:

- Ойын өте жақсы болды. Өте күшті деңгейде болды. Мен осындай жарысқа бірінші рет шығуым. Мынадай поддержканы, аураны бірінші рет сезініп тұрмын. Каждый комментарий, каждый арқау, каждый поддержка кәдімгі күшті қолдау болып келді. 

«KAZAKHMYS» корпорациясының жер-жердегі жұмысшылары төл команда үшін тақым қысып, онлайн режимде жанкүйер болды. Команда бұған дейін Астанада өткен республикалық турнирде жеңіске жетіп, халықаралық жарысқа жолдама алған.  

Досым Әлиханов, «KAZAKHMYS» командасының капитаны:

- Батыс Кенші, фабрика және де Айти Қазақмыс жігіттері бар. Барлығымыз Сәтпаев қаласында бір командада өнер көрсетеміз. Соның еңбегі, соның опыты бізге өте көмектесті.

Айта кетейік, Euro Business Cup жыл сайын корпоративтік командалар арасында өтетін турнир. «KAZAKHMYS» командасы тыңғылықты дайындалып, келесі жылы бас жүлдені алуға ұмтыламыз дейді.

Бақыт Топтаева, Серік Коңырбаев