Астанада «Үздік педагог-2024» байқауының жеңімпаздары марапатталды

Республика күні қарсаңында Астанада «Үздік педагог-2024»байқауының жеңімпаздары марапатталды, деп хабарлайды 24kz.

Оқу-ағарту министрі Ғани Бейсембаев мектепке дейінгі, орта, техникалық және кәсіптік білім беру ұйымдарының 64 педагогіне марапат табыстады. Жеңімпаздар «Үздік педагог» куәлігі мен төсбелгісін және 1000 айлық есептік көрсеткіш көлеміндегі ақшалай сыйлықақысын алды.

Айта кеткен жөн, биыл сайысқа барлық өңірден 2 мыңға жуық мұғалім қатысты. Дәстүрлі байқаудың 12 жылдық тарихында 700-ге жуық қазақстандық педагог жеңімпаз атанған.

Мереке Кенжебекова, «Үздік педагог» марапатының иегері:

- Жамбыл облысы Шу қаласындағы С.Сейфуллин атындағы қазақ орта мектебінің биология пәнінің мұғалімімін. Жалпы еңбек өтілім – 32 жыл. Осы салада аянбай еңбек етіп, қаншама шәкірттердің жүрегіне жылулық пен мейірімділік және білім мен тәрбиені қатар беріп келе жатқан адаммын. «Мен не үшін қатыстым» деген сұраққа жастарға мотивация болсын дедім.