Саран қаласында 113 тұрғын үй жаңа жылу қазандығына қосылды

Саран қаласында 113 көп қабатты үй жаңа орталық жылу қазандығына қосылды.

Қалған 150-ге жуық үй ескі желілік қазандықтармен жылытылуда. Қаладағы біраз үйге бір айдан бері жарытып жылу берілмеді. Іске қосылған бойда сыр берген жаңа қазандықты қалыпқа келтіру жұмыстары әлі жалғасып жатыр. Еске салсақ, жылыту маусымына дайындықты дұрыс ұйымдастырмаған қала әкімі жұмыстан босатылып, ал облыс басшысы Президенттен сөгіс алды.

Татьяна Бучинская бір ай бойы суық пәтерде отырды. Жаңа орталық жылу қазандығы істен шыққан соң үйді ескі желіге қайта қосты. Алайда қазан айында жылу мардымсыз берілді дейді ол. Тек бүгін пәтері жылына бастаған.  

Татьяна Бучинская, қала тұрғыны:

- Үйіміз бір ай бойы өте суық болды. Тек бүгін жылу жақсы беріле бастады. Бірақ қыстың аязды күндері қалай болады білмейміз. Алаңдайсың әрине. Орталық жылу қазандығын дұрыстап қосқанда мұндай уайым болмас еді.

Қала бойынша 260 астам көпқабатты үй мен әлеуметтік нысан бар. Қазір жартысы ескі желілік нысандарға қосылған. Алайда дұрыс жылытпайды, дейді Саран қаласының түрғыны Валерий Троць.   

Валерий Троць, қала тұрғыны:

- Біз орталық қазандыққа қосылған соң барлығы жақсы болады деп ойладық. Алайда ол қосылмай жатып істен шықты. Сол себепті үйімізді ескі желілік қазандыққа қосты. Мен бұл үйде 12 жыл тұрамын. Жылда қыста пәтеріміз суық болады.

Қазір орталық жылу қазандығына 113 көп қабатты үй қосылды. Қалған үйлер 19 желілік ескі қазандықпен жылытылады. Оларда отын қоры жеткілікті. Дұрыс жылымай тұрған үйлердің мәселесімен айналысып жатырмыз, - дейді жауаптылар.   

Ғабиден Ахметов, қалалық ТҮКШ, Жолаушылар көлігі және автомобиль жолдары бөлімінің басшысы:

- Жылуы мардымсыз үйлермен жұмыс жалғасуда. Олардың кейбірі қысқа дайын емес. Құбырларында ауа тұрып қалған, сүзгілері тазаланбаған. Оның барлығы бітеліп тұрған соң жылу әрине болмайды. Ал орталық жылу қазандығына жоба бойынша бірінші кезектегі үйлерді қосып отырмыз. Қалғанын орталық қазандықтағы қалыпты параметрлерге келтіру жұмыстары біткеннен кейін қарастырамыз.

Қаладағы орталықтандырылған жылу қазандығының құрылысы 13 жылға созылып, биыл біткен еді. Алайда жылыту маусымы басталмай жатып, сыр берді.   

Руслан Нұрланұлы, сайлау Игіліков, Зарина Зұлпыхар