Испанияда ұзақ мерзімге жалға берілетін баспанаға сұраныс көп

Бүгінде бұл ел Украинадан 120 мыңнан астам босқынды ресми қабылдап үлгерді, деп хабарлайды «Хабар 24».

Шарықтап тұрған отын бағасы, азық-түлік пен инфляция, ағылған босқындар тасқыны тағы бар: Бұл Испанияда жалдамалы тұрғын үй бағасына әсер етті. Тек сәуірде баспана құны 3,5%-ке артқан. Жүздеген адам Барселонада наразылық акциясын ұйымдастырып, билік пен пәтер иелерінен бағаны көтермеуді талап етті.

Лусия, Барселона қаласының тұрғыны:

– Билік бірінші сәуір мен отызыншы маусым аралығында ұзақ мерзімге берілетін баспана бағасын ұстап тұруға уәде еткен. Алайда мұндай көмек көрсетіліп жатқан жоқ.

Карла, Барселона қаласының тұрғыны:

– Ковид кезінде айлығымыз қысқарды, қазір отын мен азық-түлік бағасы отыз пайызға дейін артты. Пәтер ақысы бір орнында тұрған жоқ, біз қалай төлейміз? 

Испанияда баспанаға сұраныс қашанда жоғары, сондықтан бағасын төлей алмай тығырыққа тірелген тұрғындар далада қалатын болдық,- деп шағымданды. Биыл Испанияға 50 млн турист келетінін ескерсек, пәтер құны тағы артатыны сөзсіз.

Давид, Барселона қаласының тұрғыны:

– Миллиондаған турист пен мыңдаған босқын баспана мәселесін ушықтырды. Баға бір орнында тұрған жоқ, апта сайын көтеріледі.

Әлеуметтік сауалнама кезінде: Испанияда пәтерді ұзақ мерзімге алатын он адамның жетеуі баспана құнын төлей алмай қиналып жүрміз деп,- жауап берген. Испанияда халықтың 15%-і жалдамалы үйде тұрып жатыр. Барселона, Мадрид, Севилья, Сан-Себастьян сияқты ірі қалаларда 60 шаршы метрлік пәтердің айлық бағасы мың доллардан асады.

Авторлары: Аида Қыдырбай, Дмитрий Рогач