Францияда тұз өндірісі қарқын алды
«Біреуге мал қайғы, біреуге жан қайғы». Франциядағы тұз өндірушілер аптап ыстық пен құрғақшылықтан қыруар пайда тауып отыр, деп хабарлайды «Хабар 24».
Олардың өндірісі биыл 2 есе артқан. Бұл салада елдің солтүстік-батысындағы Геранд өңірі көш бастап тұр. Олар тұзды бүкіл әлемге тонналап сатуға кіріскен. Әдеттегідей жауын-шашын болмағандықтан, су буланып, кристалл заттың өнімі көбейіп, дәмі жақсарды. Ал биыл бұл аймақта 40 күннен бері бір тамшы жаңбыр жаумай, күн қатты ысып тұр.
Франсуа Дюранд, кәсіпкер:
– Біздің өндіріс рекордты деңгейге беталды. Соңғы 10 жыл бойы 1 тоннадан сәл асатын өнім алып келсек, биыл бұл нәтиже 2 есе көбейіп, 2 жарым тоннаға жетті. Климат өзгерісі бізге жағып жатыр. Бірақ өкінішке қарай, бұдан басқаларға зиян келуде. Өрт көбейіп, су тапшылыққа айналды.