Израиль әскері Газа тұрғындарын эвакуациялануға шақырды
Газа секторының солтүстік бөлігіндегі тұрғындарды Израиль әскері эвакуациялануға шақырды. Бұл туралы CNN телеарнасы жергілікті тұрғындарға сілтеме жасай отырып хабарлады. Америкалық арнаның ақпары бойынша еврей әскерилері Бейт-Лахия қаласындағы аумақтан кетуді талап ететін парақшалар таратқан. Рейтер агенттігі жариялаған бейнежазбадан азаматтардың жаппай қоныс аударып жатқанын көруге болады.
Естеріңізге сала кетейік, өткен аптада Израиль анклавтың солтүстігіндегі әскери операциясын қайта жандандырды. Нәтижесінде солтүстікте орналасқан Бейт-Ханун, Джабалия және Бейт-Лахия қалалары Газа шаһарынан оқшауланып, екі аумақ арасындағы байланысты үзді.