Үндістанда «Дана» дауылы ойран салып жатыр

Үндістанның шығысында «Дана» дауылы ойран салып жатыр. Салдарынан 1 адам қаза тапты. Күшті желмен қатар нөсер жауып тұр. Табиғат апатынан 3 мыңнан аса елді мекен тұрғындары зардап шеккен. Егіс алқаптары да бүлінді.

Манодж Ахуджа, Одиша штатының бас хатшысы:

- Дауылға байланысты 600 мыңнан аса адам эвакуацияланып, уақытша орталықтарға жайғастырылған. Оларға тегін тамақ беріліп, басқа да жағдай жасалып жатыр. Қазір электр тарату желілерін қалпына келтіру секілді жұмыстар жүріп жатыр.

Филиппинде дауылдан кейін жоғалған 11 адам әлі табылмады

Ал Филиппинде «Трами» дауылы құрбандарының саны 82 адамға жетті. Тағы 11 тұрғын әлі табылмай жатыр. Табиғат апатынан елдің орталық өңірлері зардап шеккен. Қазір уақытша орталықтарды 320 мыңнан аса адам паналап отыр. Әуе рейстері кейінге шегеріліп, 7 мыңнан аса адам жолынан қалған.