Анкарада М.Әуезовке арналған конференция өтті

Түркияның Анкара қаласында "Қазақ ұлтының ағартушысы: Мұхтар Әуезов" атты халықаралық конференция өтті.

Шара халқымыздың ұлы жазушысы, ғұлама ғалым Мұхтар Әуезовтың 125 жылдық мерейтойына орай ұйымдастырылды. Оған Түркияның белгілі ақын-жазушылары мен ғалымдары және қоғам қайраткерлері қатысты. Жазушының еңбектерін жергілікті оқырманға жақынырақ таныстыру үшін түгелдей түрік тіліне аудару мәселесі қарастырылып жатыр. Шара барасында Зейнолла Қабдоловтың «Менің Әуезовым» кітабының түрікше нұсқасы таныстырылды.

Биләл Чакыжы, ТҮРКСОЙ Халықаралық ұйымы төрағасының орынбасары:

- Біз Мұхтар Әуезовтың тек Қазақстанда немесе Қырғызстанда емес бүкіл әлемде танып білсе деп қалаймыз. Жастар оның шығармаларынан адамгершілік пен мәдениетті үйренсе екен дейміз. Оның үстіне биыл Қазақстан мен Түркия арасындағы дипломатиялық қарым-қатынастың орнағанына 30 толды. Осы орайда екі ел арасында дипломатиялық қана емес мәдени байланыстарымыз да кеңейіп, нығая түссе деп тілеймін.

Әсем Ережепқызы, "Менің Әуезовым" кітабының аудармашысы: 

- Бұл кітапты Түрксойдың жобасы ретінде қыстан бері мен аудардым. Өзім Абайдың, Мұхтардың ауылында, жайлауында туып өскен қыз болғандықтан бұл бақыттың маған бұйырғанына өте қуаныштымын. Аудару оңай деп айта алмаймын. Бірақ сонда да қуаныштымын осы істің басы-қасында болғаным үшін.