Бүгін – мәдениет және өнер қызметкерлері күні

Бүгінде елімізде 8 мыңға жуық мәдениет ошағы бар, онда 64 000-нан астам қызметкер жұмыс істейді.

ҚР Мәдениет және ақпарат министрлігі сала мамандарын кәсіби мерекесімен құттықтады.

Құрметті мәдениет және өнер қайраткерлері! Сіздерді мәдениет және өнер қызметкерлері күнімен шын жүректен құттықтаймыз! Бұл күн – адамзатты ізгілікке баулып, мейірімге үндейтін, сұлулыққа құштар, жарастыққа толы әлемге сенетін, болашақ үшін жасампаздыққа бастайтын ардақты кәсіп иелерінің мерекесі – делінген хабарламада.

Бүгінде елімізде 8 мыңға жуық мәдениет ошағы бар, онда 64 000-нан астам қызметкер жұмыс істейді. Оның ішінде театр, музей, кітапхана, концерттік ұйымдар, өнер галереялары мен басқа да көптеген мекемелерді ерекше атап өтуге болады. Сіздердің қажырлы қызметтеріңіз арқылы Қазақстанның бай мәдени мұрасы сақталып, өркендеп-дамып келеді.

Өздеріңізді өнер мен шығармашылық арқылы елдер арасындағы достық пен ынтымақтастықты жалғап отырған аштын көпір әрі нағыз мәдениет елшілері деп білеміз. Сіздерге жанкешті жұмыстарыңыз бен өз істеріңізге деген адалдықтарыңыз үшін және халықаралық аренада Қазақстанның имиджін нығайтуға қосқан зор үлестеріңіз үшін алғыс айтамыз. Сіздер арқалаған міндет – асқар таудай биік, сіздер аңсаған мұрат – мәңгілік. Сіздер атқарған қызмет – еліміз үшін аса маңызды. Баршаңызға шығармашылық табыс пен жарқын жетістіктер тілейміз! – делінген министрлік құттықтауында.