«Хабар» арнасында «Бес жұлдыз» мегажобасының гранд-финалы өтеді

Ертең 29 маусым күні кешкі сағат 19:00-де «Бес жұлдыз» мегажобасының гранд-финалы өтеді.

Осыған дейін көрсетілген 16 бағдарламаның жеңімпаздары "Хабар" телеарнасының тікелей эфирінде бақ сынайды. Шығармашылық топ ақтық сайыстың мінсіз өтуі үшін күн-түн демей жұмыс істеп жатыр. "Бес жұлдыз" жобасының жеңімпазы атансам дейтін жас әншілер де сенбінің кешін асыға күтуде.

Гранд-финалға өткен 16 қатысушы бүгін жеребе тартуға келді. Жүздерінен аздап қобалжу байқалады. Қандай сан шықса, сол реттік номерлерімен ертең сахнада өнер көрсетеді. 

Гранд-финалға қатысушылар бұрыңғыдай ел ішінде кең тараған әндерді орындамайды. Олар ақтық сайыста жаңа ән айтуы тиіс. Бірі лирикалық, екіншісі патриоттық әндер жаздырыпты. Финалға жолдама алған жас таланттың бірі Римма Ахметова. Римма үміткерлердің барлығы шетінен мықты, дейді. 

Римма Ахметова, "Бес жұлдыз" жобасына қатысушы:

- Менің әнімнің тақырыбы «Көктем». Көктем жай ғана мезгіл емес, ол махаббат, табиғаттың оянуы және одан да басқа керемет құбылыстар. Осы әнді жазу маған оңай болған жоқ. Сөзін жазуға екі айдай уақыт кетті. Аккордтарын, музыкасын, сөздерін өзім жаздым.

Жобаның мақсаты танылмай жүрген жас таланттардың бағын ашу, жұлдызын жағу. «Бес жұлдыз» мега шоуының жеңімпазы қаржылай сыйлық пен Бали аралына саяхат сертификатымен мараптатталады. Үміткерлер көрерменнің көңілінен шығып, топ жару үшін тыңғылықты дайындалып жатыр. 

Аршын Кемелжан, тілші

Ұлжан Ағлақова, "Бес жұлдыз" жобасына қатысушы:

- Менің қасымда тұрған «Бес жұлдыз» мега шоуының екінші кезеңіне жолдам алған қатысушының бірі Ұлжан Ағлақова. Ұлжан айтыңызшы мына екінші кезеңге дайынсыз ба, қандай ән алып келдіңіз? 

- Әрине, екінші кезеңге сақадай сай дайынмын. «Жылы жүрек» деген әнді алып келдім.

- Ол әннің авторы кім, қалай жазылды?

- Ол әннің авторы Ұшқын Жамалбек. Ол кісімен хабарласып, аға мен осы кейінгі кезде махаббат туралы да ән айтқым келмейді. Бірақ мен адамның ішкі жан дүниесі туралы, адамның ниеті туралы бір ән жазып беріңізші маған, деп өтінген болатынмын. Сол өтінішім бойынша Ұшқын аға жақсылап тұрып, керемет туынды жазып берді.

- Өте тамаша, енді біз қатысушыларға сәттілік тілейміз. 

Айта кетейік, көрерменнің көңілінен шыққан «Бес жұлдыз» жобасының гранд-финалы ертең кешкі сағат 19:00-де көрсетіледі. Тікелей эфирде өтетін бәсекелі шоуға көрермен «Хабар» арнасының телеграм каналы арқылы дауыс береді. Шын талантты көрермен анықтайды. 

Аршын Кемелжан, Валентин Лобанов