Шоқан Уәлиханов туралы мультфильм жарық көрді

Елде тұңғыш рет этнограф-ғалым, шығыстанушы Шоқан Уәлихановтың шығармашылығын насихаттау мақсатында фэнтези жанрында мультфильм жарық көреді.

Мұны жас көрерменер енді 3Д форматында тамашалай алады. Шоқанның шытырманға толы Қашқарияға сапары қыркүйек айында көгілдір экран арқылы көрсетіле бастайды. 

Астаналық Рамазан Еркінбек екі жылдан бері қоғамдық жұмыстарға белсене араласады. Ол бала күнінен жақсы бір дүниелерді ойлап табуға машықтанған. Қазір замандастарына тарихи тұлғалардың өмірбаянын насихаттап жүр. Жас белсенді жуырда көрерменге жол тартатын Шоқан Уәлиханов туралы мультфильмге де өз үлесін қосқан. 

Рамазан Еркінбек, қала тұрғыны:

- Шоқанды таңдаған себебіміз Қазақстан тарихындағы орыны бөлек екенін өсіп келе жатқан ұрпаққа көрсету. Бірінші бізде комикс болып шықты. Комикс болғаннан кейін жақын арада анимация жасап, балаларға арналған мультфильм ретінде шықты. 

Өнерге құштар азамат жас көрермендердің жалықпайтынына сенімді. Айтуынша, Шоқанның шытырманға толы сапары алдымен комикс ретінде жарық көрген. Кейіннен сұраныс артып, таңғажайып туындыны 10 бөлімнен тұратын анимациялық мультфильмге айналдырған.

Ғалым Байтұқ, идея авторы:

- Бір ерекшелігі бар. Бір қызығы ол фэнтези мультфильм болады. Ішінде айдаһарлар, әртүрлі мыстан кемпірлер Шоқанға шабуыл жасайды. Сондықтан ол қызық болады жастарға. Құдай бұйыртса осы қыркүйекте телевидениеге шығарамыз. 

Жоба жетекшісінің айтуынша Шоқан Уәлихановтың туғанына 190 жылдығына орай келесі жылы балаларға арналған толықметражды фильм дайындалады. Бұл да көрермендердің қызығушылығын тудырады деп отыр.

Асантемір Қаршығаұлы, Нұрғали Мамырбаев