Алматыда «Парковщики» фильмінің премьерасы өтті

Алматыдағы «Kinopark 11 IMAX Esentai» кинотеатрында «Парковщики» фильмінің премьерасы өтті.

Фильм отандық Tiger Films продюсерлік компаниясының қолдауымен экранға шықты. Туындыны тамашалауға келген көрерменге бағалы сыйлықтар беріліп, автокөлік ойнатылды.

«Парковщики» комедия жанрындағы фильм. Қаладағы автотұрақтың бірінде жұмыс істейтін екі студент  байлықты армандайды. Бірақ жолын білмейді. Бір күні белгісіз адамдар тұраққа қымбат көлікті қойып кеткенін көреді. Есігі ашық қалған, жүк салғышында мол ақша жатады. Міне, осы сәттен бастап жігіттердің күнделікті күйбең тіршілігі өзгеріп, неше түрлі оқиғаларды бастан кешеді. Басты рөлді тәжірибелі актер Азат Жұмаділ ойнады.  

Азат Жұмаділ, актер:
- Түсірілім негізінен Алматы мен Алматы облысында болды. Кәсібімді жақсы көремін. Әр кейіпкердің болмыс-бітімін, мінез-құлқын көрерменге жеткізгім келеді. Киноға түсу сонысымен қызық.

Фильмнің режиссері – Әнуар Матжанов. Ол бұған дейін комедия, отбасылық кино және шытырман-экшн жанрында  оншақты картина түсірді. «Парковщики» криминалды комедиясына негізінін жас актерлер қатысты. Tiger Films отандық компаниясы қолдау көрсетті. 

Дәулет Өсербай, актер:
- Өте керемет кейіпкер. Қызықты болады. Мінезі ауыр жігіт, тез ашуланады. Кино өте жақсы деңгейде түсірілді. Барлықтарыңызды кинотеатрға шақарамын. Келіңіздер, көріңіздер. Қызықты болады.

«Kinopark 11 IMAX Esentai» кинотеатрында өткен премьераға белгілі актерлер мен өнер адамдары қатысты. «Парковшики» фильмі 17 қазаннан бастап экранға шығады. 

Авторлары: А. Садуақас, Ә.Нарынбаев