Еліміздің кинотеатрларында «Гладиатор 2» фильмі көрерменге жол тартты
Бүгіннен бастап Kinopark және Kinoplexx кинотеатрлар желісінде «Гладиатор» фильмінің екінші бөлімі көрерменге жол тартты, деп хабарлайды 24kz.
Картинаның жабық көрсетілімі Halyk IMAX Kinopark 16 кинотеатрында өтті. Оған елге танымал әншілер мен актерлер, блогерлер шақырылған. Премьераның ажарын келтіріп, сол дәуірдің тыныс-тіршілігін көрсету үшін WINOX PRO фитнес клубының жаттықтырушылары ежелгі римдіктердің киім үлгісінде киініп келді.
Halyk IMAX Kinopark 16 кинотеатры ерекше кейіпке енді. «Гладиатор 2» фильмінің жабық көрсетіліміне келген қонақтар көне Рим империясына оралғандай әсер алды. Тарихи кинодағыдай үлгіде киініп, қолына қылыш пен қалқан ұстаған жігіттер көрерменді күтіп алып, суретке түсіп кешті айшықты етті.
Нұрболсын Жалғасбеков, Winox Pro фитнес клубының менеджері:
- «Гладиатор 2» фильмі жауынгердің рухын көтереді және қайрат пен жігерлікті көрсетеді. Фильм көрерменді спортпен айналысуға дәріптейді деп сенеміз. Біз фитнес клубында рух пен денені қатар шынықтырамыз. Сондықтан да осы картина біздің мақсатымызға жақын. Көрермен де үлкен әсер алады деп ойлаймыз.
Гладиатордың алғашқы бөлімінде Рим империясының қолбасшысы болған Максимустың тағдыры көрсетіледі. Екінші фильмде осыдан 20 жылдан кейінгі өмір суреттеледі. Оқиға император Марк Аврелийдің немересі Луцийдің төңірегінде өрбиді. Отбасымен Нумидияда тұрып жатқан ол Рим әскерінің шапқыншылығынан соң құлдыққа түседі. Сюжет желісі қызық. «Гладиатор 2» фильмі ширек ғасырдан кейін экранға шығып отыр.
Роза Әшірбаева, блогер, актриса:
- Күйеуіміз екеуміз жас кезімізде бірінші бөлімін көріп, қайта-қайта көріп, баяғыда болушы еді ғой кассетасы соны арендаға алып көруші едік. Бүгін жабық көрсетілімде қарадық, өте эффектно түсірілген. Енді оператордың жұмысы, актерлердің ойыны керемет ойдан шықты.
«Гладиатор 2» картинасын Орталық Азиядағы ең үлкен IMAX залында көру тіпті керемет әсерге бөлейді. Режиссер Ридли Скотт таспалаған тарихи туынды бүгіннен бастап еліміздегі Kinopark және Kinoplexx кинотеатрлар желісінен көрсетіледі.
Авторлары: Аршын Кемелжан, Сержан Жұмабаев