Ақмола облысында кәсіби қабылдаушы отбасылар пайда болады
Қазірдің өзінде 10-ға жуық өтінім түскен. Бұл жанұялар ата-ана қарауынсыз қалған балғындарды бауырына басады, деп хабарлайды «Хабар 24».
Пилоттық жоба аясында бір отбасы 7 балаға дейін асырап алуға мүдделі. Бірінші кезекте қабылдаушы отбасының жағдайы мен тұратын тұрғын үйі тексеріледі. Себебі 1 балғынға 1,5 шаршы метрден орын бөлінуі тиіс. Сондай-ақ ата-аналар арнайы оқыту курстарынан да өтеді. Ал кәсіби қабылдаушы отбасы мен асырап алушы жанұяның өзіндік айырмашылығы да бар.
Мерует Жанботина, облыстық білім басқармасының бас маманы:
- Кәсіби қабылдаушы отбасы мен асырап алушылардың басты айырмашылығы – ата-ана қарауынсыз қалған бала жетімдер үйіне жіберілмейді. Бірден осы отбасыға беріледі. Бұл өз кезегінде баланың психологиясына оң әсер етеді. Пилоттық жобаның мақсаты – аймақтағы балалар үйін қысқартып, балғындардың жайлы өмір сүруін қамтамасыз ету.