Мақат ауданында ескі тұрғын үйлерді жөндеу басталды
Мақат ауданында көп қабатты үйлерді жөндеу жұмыстары басталды.
Бұл баспаналар өткен ғасырдың 70-80 жылдары салынған. Сол кездегі жоба бойынша төбесі жұмсақ жабындымен жабылған екен. Енді жылдар өте келе төбедегі қара қағаз тозып, жапсарларынан су аға бастады. Сондай-ақ көптен күтімсіз қалған үйлердің келбеті көнеріп, желдеткіш шахталары бітеліп қалған. Тұрғындардың өтініші бойынша жергілікті билік биыл ғимараттардың шатырын көтеріп, қас бетін әрлеуге кірісті. Осы мақсатқа облыстық бюджеттен 1 млрд теңге қарастырылған. Мақат, Доссор кенттерінде 100 ден аса көп қабатты үй бар. Олар кезең-кезеңімен жөнделетін болады.
Жандарбек Сарбасов, аудандық ТҮКШ бөлімінің сектор меңгерушісі:
- Бұл-аудандағы елді мекендерді бірыңғай архитектуралық келбетке келтіру мақсатында «тұрғын үй қатынастары туралы» Заңға енгізілген өзгерістердің арқасында осындай жұмыстарды бастап жатырмыз. Аудан орталығы- Мақат кентінде 12 көп қабатты тұрғын үйдің төбе шатырын жөндеу жұмыстары жобаланған. 4 үйдің жұмысын бастадық, әзірге.