Ақмола облысында әлеуметтік желіде тараған видеодан кейін қараусыз жүрген жылқылардың иесі анықталып, әкімшілік жауапкершілікке тартылды, деп хабарлайды «24KZ».
Оқиға Талапкер ауылында болған. Жергілікті тұрғын әлеуметтік желіде ауыл көшелерінде еркін жүрген жылқылардың видеосын жариялап, жануарлардың жолда апат тудырып, қауіп төндіруі мүмкін екенін және көшелерді ластап жатқанын жеткізген.
Бұл ақпаратты дереу тексерген полицейлер бейнебақылау камераларындағы жазбаларды зерделеді. Тексеру барысында 29 қыркүйек күні түнде сағат 03:00 шамасында Талапкер ауылының Достық көшесінде алты жылқының қараусыз қалғаны анықталды.
Белгілі болғандай, жануарларды бағатын тұрғын түнде оларды жоғалтып алған. Ол малды өз бетінше іздеп жүрген кезде, жылқылар елді мекенге кіріп кеткен.
Тәртіп сақшылары жауапсыздық танытқан ер адамға қатысты үй жануарларын жаю және ұстау ережелерін бұзғаны үшін әкімшілік хаттама толтырды. Сондай-ақ онымен түсіндірме жұмыстарын жүргізіп, малды қараусыз қалдырмау қажеттігі қатаң түрде ескертілді.
Полиция департаменті ауыл шаруашылығы жануарларының иелерін сақ болуға шақырады. Сонымен қатар, тұрғындарға мұндай заңбұзушылықтар туралы уақтылы хабарлап отырудың маңызы зор екенін еске салады, өйткені бұл жол-көлік оқиғалары мен басқа да жағымсыз жағдайлардың алдын алуға мүмкіндік береді.
