Қарқаралы ауданындағы өрт сөндірілді

Қарқаралы ауданындағы дала өрт сөндірілді, деп хабарлайды 24kz.

Тікұшақпен қайта барлау кезінде жаңа өрт ошақтары анықталған жоқ.

Руслан Нұрланұлы, тілші:

- Нақты неше аумақтың жанып кеткені жайында әзірге ақпарат жоқ. Тағы да барлау жүргізіліп, түстен кейін жиналыс өткізіледі. Сол кезде неше гектар жердің күлге айналғаны айтылады. Жалпы бүгін таңғы 9-дан бастап тікұшақтар барлау жүргізген болатын. Жел салдарынан тұтанған жаңа өрт ошақтары анықталмады. Дегенмен төтенше жағдай қызметкерлері күн-түн демей кезекшілікті атқара бермек. Қазір өрт шарпыған аумақта 300 адам мен 37 техника бақылауда жүр. Осы 3 күн бойы болған өртті сөндіруге қатысқан Қуаныш Жүкеновті тыңдап көрсек.

Қуаныш Жүкенов, өрт сөндіруші:

- Қиыншылығы сол, жел күшті, 15 метр секундқа дейін. Жан-жақтан өршиді. Біреуін сөндірсең, екінші жағынан шығады.

Жергілікті биліктің мәлімдеуінше, өрт кезінде мал шығыны тіркелмеген. Арнайы ақпараттық желі жұмыс істеп тұр. Өрттен қандай да бір шығынға тап болған тұрғындар 8(72146) 31366 нөміріне хабарласа алады. Кейін жергілікті ауқымдағы төтенше жағдай енгізілген соң келтірілген шығын өтеледі.