Ресейге кіру талаптары өзгереді

1 шілдеден бастап Ресейге тек арнайы QR-код арқылы өтуге болады. Осы елге баруды жоспарлап отырған отандастарымыз үшін шекарадан өту тәртібі өзгерді.

Қазақстан Сыртқы істер министрлігінің ресми өкілі Ерлан Жетібаев осылай деп хабарлады. Енді Ресейге жұмысқа немесе оқуға баратын Қазақстан азаматтарына ruID мобильді қосымшасын пайдалану қажет. Белгіленген тәртіп бойынша шетел азаматтары қосымшада жеке профиль ашып, шекарадан өту туралы электронды өтініш беруі тиіс.

Ерлан Жетібаев, ҚР Сыртқы істер министрлігінің ресми өкілі:

- Белгіленген тәртіпке сәйкес, шетел азаматы аталған қосымшада жеке профиль ашып, РФ-ға кіру туралы өтінішті мемлекеттік шекараның жоспарланған күнінен кемінде 72 сағат бұрын тапсыруы қажет. Өтініш қаралғаннан соң қосымшада кіру құқығын растайтын жеке код қалыптастырылады. Аталған код өтініш берілген сәттен бастап 90 күн бойы жарамды.