Балқаш қаласында алғаш рет спорт фестивалі өтті
Қарағанды облысының Балқаш қаласында алғаш рет спорт фестивалі өтті.
Жалпыхалықтық шараға шамамен 3 мың адам қатысқан. Олар бір ай бойы спорттың бірнеше түрінен сынға түсті. Мысалы «Денсаулыққа жол» марафонына қаланың 300 тұрғыны қатысса, волейболдан өткен жарысқа Шет, Ақтоғай аудандары мен Приозерск қаласының командалары келді. Бұдан бөлек қазақ күресі, асық ату, қол күресі, арқан тарту секілді ұлттық спорт түрлерінен де жарыстар ұйымдастырылды. Жеңімпаздардың барлығы бағалы сыйлықтармен марапатталды. Фестивальдің жабылу салтанатында өнер жұлдыздары концерт қойып, мерекелік отшашу болды.