Көшпенділер ойындары: жеңімпаздарға Күн басты адам бейнеленген медаль беріледі

Елордада 8-13 қыркүйек аралығында өтетін 5-ші дүниежүзілік көшпенділер ойындарына 76 күн қалды.

Туризм және спорт вице-министрінің айтуынша, нысандардың басым бөлігі жарыс өткізуге дайын. Ойынға 89 елден, 2500 спортшы қатысып, 21 спорт түрінен бақ сынасады. Жеңімпаздарға арналған жүлде қорының көлемі 253 млн теңге болды. Қаржыны серіктестер мен демеушілер бөлген. Бұл туралы орталық коммуникациялар алаңында ойынды дайындау және өткізу дирекциясының вице-президенті хабарлады. Ол баспасөз конференциясы барысында жүлдегерлерге табысталатын медальдерді де таныстырды.

Наиль Нұров, V Дүниежүзілік көшпенділер ойындарын дайындау және өткізу дирекциясының басшысы:

- Медальдің ортасында көшпенділер өркениетінің белгісі – ат үстіндегі Күн басты адам бейнесі бар. Медальде спорт, мәдениет, ғылым салаларын қамтитын негізгі 3 символ бедерленген. Оның барлығын Қазақстан халқының бірлігін білдіретін Шаңырақ көмкеріп тұр.