Иван Дычко: Жалоловты жеңе аламын

Жалоловпен кездесіп жатсам, оны жеңе аламын.

Тіпті нокаутпен де ұтуым мүмкін. Аса ауыр салмақтағы қазақстандық кәсіпқой боксшы Иван Дычко осындай мәлімдеме жасады. Ол vesti.kz порталына берген сұхбатында өзбекстандық былғары қолғап шеберіне бөлек тоқталған. «Қазір онымен кездесудің еш мәнін көріп тұрған жоқпын. Бұған дейін жолықтық. Егер тағы да рейтингтегі жағдайды жақсарту үшін, не титулдық жекпе-жекке жақындау үшін қажет болса, жұдырықтасуға дайынмын. Бұл кездесуде, әрине, мен фаворит боламын. Тіпті нокаутпен де жеңуім мүмкін», - дейді Дычко. Қос мықты әуесқой бокста 4 рет кездесіп, 4-еуінде де жерлесіміз жеңіске жетті. Қазір екеуі де кәсіпқой бокста өнер көрсетеді. Иван Дычко 13 кездесу өткізіп, 13-інде де басым түсті. Тіпті оның 12-сін нокаутпен аяқтады. Ал Баходир Жалолов көрсеткіші 14 жекпе-жек, 14 жеңіс. Баходир барлық кездесуін уақытынан бұрын аяқтаған.