Euronews директорлар кеңесінің төрағасы Көшпенділер ойындарын тамашалады

«Қазанат» ипподромы мен этноауыл аумағында күллі түркі жұртының ұлттық салт-дәстүрін көріп, таңданысын жасыра алмаған шетелдік мейман көп.

Құрметті қонақтардың қатарында Euronews директорлар кеңесінің төрағасы Педро Варгас Давид мырза да бар.

Естеріңізде болса, биыл шілде айында Euronews пен Мәдениет және ақпарат министрлігі ынтымақтастық жөніндегі алғашқы меморандумға және артынша келісімшартқа қол қойды. Осыған байланысты алдағы уақытта елімізде Euronews өкілдігі ашылады.

Педро Варгас Давид, Euronews директорлар кеңесінің төрағасы:

- Көкпардан Қазақстан құрамасының өзбекстандық команданы ірі есеппен жеңген ойынын көріп, алаң қожайындарының қарқынына таңғалдым. Ат үстінде отырып, серкеге таласу оңай шаруа емес. Мұндағы спорттың әр түрі ерекше. Кеше Астана Арена стадионында V Дүниежүзілік көшпенділер ойындарының ашылу салтанаты керемет өтті. Бейбітшілікті ту етті. Адамзат баласына ортақ құндылықтар дәріптелді. Осының барлығына ұйытқы бола білген Мәдениет және ақпарат министрлігіне айтар алғысым шексіз.