Бүгін футзалдан Қазақстан мен Аргентина матчы өтеді

«Жартылай финалға жолдама алып, қазақстандық жанкүйерлерді қуантуға тырысамыз». Футзалдан әлем чемпионатының кезекті кездесуі алдында ұлттық құрама өкілдері осындай мәлімдеме жасады.

Рикарда Кака баптайтын жігіттер кеше ғана Ташкент қаласына жетіп, негізгі ойын өтетін Хумо Аренада дайындықты пысықтап жатыр.

Айта кетейік, Қазақстан құрамасы ширек финал аясында Аргентина командасымен жолығады. Көпшілік тағатсыздана күтіп жүрген матч бүгін жергілікті уақытпен 20:00-де басталады. Қос команда әлем чемпионатының алдында Алматы қаласында жолдастық кездесу өткізіп, онда жерлестеріміз 3:2 есебмен жеңіске жеткен еді.

«Десе де, босаңысуға болмайды», - дейді мамандар. Аргентина құрамасының әлем чемпионы болғанын және одан кейін әлем чемпионатының финалында да ойнағанын ұмытпау керек.

Лое Игита, ұлттық құрама капитаны:

- Кезекті дайындыққа кірістік. Португалиямен болған мачты ұмытып, барлық ынтамызды Аргентинаға ауыстыруымыз қажет. Жігіттердің көңіл-күйі жақсы. Жаттығулар да ойдағыдай өтіп жатыр. Қайтадан барлық күшімізды жиып, командалық ауызбіршілік танытып, қазақ жанкүйерлеріне әдемі футбол көрсетуге тырысамыз.