Ұлытау облысында «AUYL SPORT – 2024» өңірлік лигасы өтіп жатыр
«AUYL SPORT – 2024» өңірлік лигасы Жезқазғанда өтіп жатыр. Аты айтып тұрғандай, мұнда тек ауылдық балалар мен жасөспірімдер командалары қатысып отыр. Жарысқа 500-ден астам спортшы келді. Жеңімпаздар Алматыда өтетін лиганың республикалық кезеңіне қатысуға жолдама алады.
Өңірлік лига «AUYL SPORT» жобасы аясында ұйымдастырылды. Ол ауылдық спортты қолдау және дамыту мақсатында «HALYK» қайырымдылық қорының бастамасымен жүзеге асырылады. Ұлытау облысы бойынша жоба үйлестірушісі Алмас Ілиясовтың айтуынша, іріктеу турнирлері республиканың барлық өңірінде жергілікті әкімдіктердің қолдауымен өтеді.
Алмас Ілиясов, Ұлытау облысы бойынша «AUYL SPORT» жобасының үйлестірушісі:
- «AUYL SPORT» жобасының негізгі мақсаттарының бірі – ауыл балалары арасында спортты насихаттау, талантты балаларды шығару. Сондай мақсатта ұйымдастырылып отыр және де спорт төрешілердің біліктілігін арттыру мақсатында ұйымдастырылып отырған жобалардың бірі.
«Мұндай турнирлер спорттағы дарынды балаларды анықтауға және оларды қолдауға мүмкіндік береді», – деп есептейді жоғары спорт шеберлігі мектебінің басшысы Саят Балмағанбетов.
Саят Балмағанбетов, Ұлытау облысы жоғары спорт шеберлігі мектебінің басшысы:
- Ауылдардан көптеген чемпион шыққан. Осы ең соңғы Олимпиадада топ жарған Елдос Сметов бауырымыз осы ауылдан шыққан. Ендігі мақсат, осы Ұлытау облысында да осындай Олимпиада чемпиондары, әлем чемпиондары шықса деген ойдамыз.
Үш күн ішінде Жезқазғанның спорт алаңдарында бокс, еркін күрес, карате, баскетбол, волейбол және шахматтан жарыстар өтеді. Жүлдегерлерге диплом мен сыйлықтар табысталады. Сондай-ақ І орын алған спортшылар мен командалар республикалық лигаға қатысу үшін қаржылай қолдау алады.
Авторлары: Ғазиза Мұхамеджанова, Нұрбол Үздікбаев.