«Aktau Chess Week-2024» сайысында үш рекорд тіркелді

Ақтауда шахматтан республикалық жарыс өтіп жатыр, деп хабарлайды 24kz.

«Aktau Chess Week-2024» сайысында үш рекорд тіркелді. Отбасылық турнирге 64 жанұя қатысып, әлемдік көрсеткіш жаңарды. Бұған дейін басқа елдерде өткен турнирлерде 58 отбасы бақ сынаған екен. Сондай-ақ бір мезеттік ойын сеансына 160 спортшы қатысып, олар аумағы 600 шаршы метрлік шахмат тақтасында сайысқа түсті. Бұл да Қазақстан шахмат спорты тарихында рекорд ретінде тіркелді. Республикалық зияткерлік жарысқа 400-ге жуық адам қатысып жатыр. Жеңімпаздар қаржылай сыйлыққа ие болады.

Әнуар Шайхымов, шахмат чемпионатының супервайзері:

- Екі күннің ішінде бізде үлкен төрт іс-шарамыз бар. Соның ең бастыларының бірі – ол отбасылық турнир. Әкесі мен баласы, не болмаса шешесі мен баласы басқа командаларға қарсы ойнайды. Бұл жерде әлемдік рекорд орнаттық. Және де бұл жерде сеансерлар, Қазақстанның әр өңірінен келген сеанс берушілер балалармен ойнап, өз тәжірибесімен бөлісті. Бүгін барлық төрт турнирдің де қорытындылары шығады.