Хоккей: Қазақстан жастар құрамасы ірі есеппен жеңіске жетті
Қазақстан жастар құрамасы ірі есеппен жеңіске жетті.
Шайбалы хоккейден әлем чемпионаты алдында өткен соңғы дайындық матчта жерлестеріміз Канадада жергілікті «Хоксбери Хокс» құрамасымен кездесті. Нәтижесінде отандастарымыз 8:1 есебімен жеңіске жетті. Құрама сапында Әділ Бейсембаев пен Кирилл Ляпунов дубль жасады. Сонымен қатар Никита Ситников, Семен Симонов, Артур Гросс және Асанәлі Русланұлы бір-бір шайбадан соқты. Ең нәтижелі ойыншы Ляпунов болды. Ол екі шайба соғып қана қоймай, үш нәтижелі пас берді. Естеріңізге сала кетейік, бұған дейін Қазақстан құрамасы Германиямен өткен жолдастық матчта жеңіліс тапқан еді. Әлем чемпионатында ұлттық құрама алғашқы матчты 27 желтоқсанда Швецияға қарсы өткізеді. Сондай-ақ В тобына Чехия, Словакия және Швейцария құрамалармен кездеседі.
Елена Рыбакина Дубайдағы турнирде жеңімпаз атанды
Елена Рыбакина Дубайда жеңіске жетті. Жерлесіміз өнер көрсеткен «Сұңқарлар» командасы World Tennis League-2024 көрме турнирінің жеңімпазы атанды. Әлемдік теннис лигасында «Сұңқарлар» намысын Рыбакинадан бөлек ресейлік Андрей Рублев, канадалық Денис Шаповалов және франциялық Каролин Гарсия қорғады. Олар финалда Хоукс командасын тізе бүктірді. Осы додада жерлесіміз төрт жекелей кездесу өткізіп, соның біреуінде румыниялық Симона Халепті ұтты. Қалған үшеуінде әлемнің 1-ракеткасы, беларусьтік Арина Соболенкодан, Польша өкілі Ига Швентектен және ресейлік Мирра Андреевадан жеңіліп қалды. Енді Елена 27 желтоқсан мен 5 қаңтар аралығында ұлттық құрама сапында Аустралияның Сидней және Перт қалаларында өтетін United Cup турнирінде ойнайды.
Еркін күрестен халықаралық турнир
Таразда мемлекет және қоғам қайраткері Д. Қонаевты еске алуға арналған еркін күрестен ересектер арасында халықаралық турнир өтті. Жарысқа Қазақстан, АҚШ, Қырғызстан, Австралия, Бразилия, Өзбекстан, Ресей, Моңғолия және Қытай елдерінің спортшылары келді. Турнирдің бірінші күнінде 57 келі, 65 келі, 74 келі, 86 келі және 97 келіде жүлделер сарапқа салынды. Сайыстың басты таңғаларлық оқиғасы құрамамыздың көшбасшыларының бірі Ризабек Айтмұханның жеңілісі болды. Жартылай финалда ол америкалық Джонатан Айеллоға 9:12 есебімен есе жіберді. Артынша қарсыласы финалға шығып жерлесіміз үшінші орын үшін белдесуге мүмкіндік алды. Нәтижесінде қола жүлдеге қол жеткізді. Ал, Азамат Дәулетбеков болса финалда өзбек балуаны Шерзод Пойоновты 3:0 есебімен жеңіп, чемпион атанды.
Үш каратэшіміз әлем үздіктерінің қатарына енді
Үш каратэшіміз әлем үздіктерінің қатарына енді. Әлемдік каратэ федерациясы әр салмақ бойынша ең үздік ТОП-5 рейтингті жариялады. Ерлерден 75 келіге дейінгі салмақта Токио олимпиадасының қатысушысы, Әлем чемпионатының екі мәрте жүлдегері, 2023 жылы Қытайда өткен Азия чемпионатының жеңімпазы Нұрқанат Әжіқанов өз салмағы бойынша екінші орынға тұрақтады. 67 келіге дейінгі салмақта 2018 жылғы Азия ойындарының күміс жүлдегері, 2023 жылы Ханчжоуда өткен Азия ойындарының қола жүлдегері Әмірәлі Дидар рейтингте төрттікті түйіндеп тұр. Ал әйелдер арасындаы +68 келі салмақта рейтингтің көшін отандасымыз София Берульцева бастап тұр. Ол 2020 жылғы Токио олимпиадасының қола жүлдегері, 2022 және 2023 Азия чемпионаттарының чемпионы. Сонымен қатар 2022 Ханчжоудағы Азия ойындарының жеңімпазы.
«Ордабасы» клубының бас бапкері тағайындалды
Молдовалық маман Андрей Мартин «Ордабасы» футбол клубының бас бапкері болып тағайындалды. Ол осыған дейін өз елінің «Петрокуб» командасындың тізгінін ұстады. 2023/2024 жылғы маусымда аталған ұжыммен Молдова чемпионаты мен Молдова Кубогын жеңіп алды. Команда УЕФА Конференциялар лигасының топтық кезеңінде ойын көрсетті. Ал шымкеттік клубты Кирилл Кекер жаттықтырған болатын. Ол бұл қызметке биылғы жылдың тамыз айында келді. Кекердің баптауымен команда ел біріншілігінде төртінші орынды місе тұтты.