Бокстан ел чемпионаты аяқталды
Ертең шайбалы хоккейден жастар арасындағы әлем чемпионаты басталады. Біріншілік Канада астанасы Оттавада 5 қаңтарға дейін жалғасады.
Ұлттық құрама В тобында өнер көрсетіп, плей-офф кезеңіне шығу үшін Швеция, Чехия, Швейцария және Словакия құрамаларымен өзара мықтыны анықтайды.
Төрехан Сабырхан ерлер арасында, Назым Қызайбай әйелдер арасында үздік атанды. Кеше Қарағандыда бокстан ел чемпионаты аяқталды. Жыл соңындағы жарысқа 238 ер, 95 бұрымды былғары қолғап шебері қатысты. 67 келідегі Төрехан Сабырхан ел чемпионы болды. Оның қарсыласы Санатәлі Төлтаев жекпе-жекке шыққан жоқ. Аса ауыр салмақтағы Нұрлан Сапарбай да алтын медаль еншіледі. Ең жеңіл салмақта тәжірибелі Теміртас Жүсіпов топ жарды. Ақмола облысының өкілі финалда Нұрзат Оңғаровтан басым түсіп, Қазақстанның 8 дүркін жеңімпазы атанды. 54 келіде Тимур Қабдешовтің бағы жанды. Әйелдер арасында Назым Қызайбай, Алуа Балқыбекова жеңіске жетті.
Елдос Сметов пен Давид Дегтярев «Жылдың үздік спортшысы» атанды
Елдос Сметов пен Давид Дегтярев жылдың үздік спортшысы атанды. Астанада Туризм және спорт министрлігінің ұйымдастыруымен «Үздік 2024» шарасы ұйымдастырылды. Ербол Мырзабосынов биылғы жыл отандық спорт үшін ерекше жыл болғанын атап өтіп, үздіктерді марапаттады. Жыл қорытындысы бойынша қос батырдың бапкері Ғалымжан Жылгелдиев пен Юрий Колесников жылдың үздік жаттықтырушысы деп танылды. Қуанышбек Есекеев болса 2024 жылдың үздік федерация президенті марапатын алды. Үздік спорттық өңір атағы Жамбыл облысының спорт басқармасына бұйырды. Ақмарал Науатбек спорттағы үздік серпін номинациясын иеленді. Ал спорт журналисі Жандос Айтбайұлы Сейдахмет Бердіқұлов атындағы сыйлықтың лауреаты атанды.
«Барыс» қатарынан үшінші мәрте жеңіліп қалды
«Барыс» қатарынан үшінші мәрте жеңіліп қалды. Елордалық клуб құрлықтық хоккей лигасындағы кезекті ойынын өз айдынында Ресейдің «Трактор» командасына қарсы өткізді. Алғашқы минуттан ресейлік команда тізгінді қолға алуға тырысты. Нәтижесінде бірінші кезеңде қатарынан екі шайба соғып кетті. Екінші кезеңде де ресейлік клубтың басымдығы байқалып тұрды. Есеп 4:0. Ал кездесудің үшінші бөлігінде елордалықтар есеп айырмасын қысқартуға тырысты. Алайда тағы бір шайбаны өз қақпасына жіберіп алды. Осылайша Барыс қарсыласына 3:5 есебімен есе жіберді. Енді ертең қазақстандық команда өз алаңында Сібірмен кездеседі.
Қысқы Азия ойындарына дайындық
Конькимен жүгіруден қысқы Азия ойындарына қатысатын Ұлттық құрама белгілі болды. Астанадағы оқу-жаттығу жиынында 19 спортшы іріктелді. Ақ Азиада 2025 жылдың 7-14 ақпан аралығында Қытайдың Харбин қаласында өтеді. Кешенді сынды қабылдайтын шаһар спорттық сайыстарға қызу дайындалып жатыр. Қазір Харбинде дәстүрлі мұзды шоу шарасы басталды. Қытайдың солтүстік-шығысындағы өңір қатты қысымен танымал. ІХ Азия ойындарының бір бөлігі Харбиннен 200 шақырым жерде орналасқан Ябули қаласында да өтеді. Ақ ойындарға құрлықтың 32 елінен 1 147 спортшы қатысады. Қазақстан құрамасы сапында 139 спортшы бар. Олар 6 спорт түрінен медалға таласады.