EXPO аумағында жазғы концерттік маусым ашылды
Қазақстан эстрадасының жарық жұлдыздары 3 ай бойы ашық аспан астында тегін концерт береді.
Бүгін EXPO іскерлік аумағында жазғы концерттік маусым басталды. Енді әр демалыс күні «101» тобы, Қайрат Баекенов, Маржан Арапбаева және Мирас Жүгінісов сынды өнер иелері Астана тұрғындары мен қонақтарын өз әндерімен қуантады. Бұл игі шараны QazExpoСongress ұлттық компаниясы ұйымдастырып отыр.
Қала тұрғындары мен қонақтарына жаз айларында ерекше көңіл күй сыйлап, мәдени демалыс ұсыну. Осыны мақсат еткен QazExpoСongress ұлттық компаниясы жаз бойы тегін концерт ұйымдастырады. Әр демалыс күні EXPO аумағындағы жазғы сахнада Қазақстан эстрадасының жарық жұлдыздары ән шырқап, елордалықтарға жақсы демалыс ұсынады.
Гүлжан Сергебаева, «QazExpoСongress» ҰК» АҚ баспасөз хатшысы:
- Сахнада маусым мен қыркүйек аралығында концерттер өткізіледі. Былтыр мысалы 13 концерт өткізілді. Биыл да біраз концерт өткіземіз деген жоспар бар. Солардың ішінде «101» тобы мен Қайрат Баекенов, Маржан Арапбаева, Мирас Жүгінісов сынды әртістер өз өнерлерін көрсететін болады. Бүгін жазғы сахнаның шымылдығын этнофестиваль ашады.
Сонымен қатар EXPO аумағында келушілер үшін «Болашақ энергиясы» мұражайы жұмыс істейді. Мұнда қала қонақтары баламалы қуат көздерінің түрлерімен таныса алады. Ал кішкентай балаларды іскерлік аумақта роллердром алаңы күтеді. Бұнда жасөспірімдер өз демалысын белсенді түрде өткізе алады. Ал бүгін бұл маңда Garage fest жәрмеңкесі де жұмысын бастады.
Гүлжан Сергебаева, «QazExpoСongress» ҰК» АҚ баспасөз хатшысы:
- Жәрмеңке күндізгі сағат 2-ден кешкі сағат 10-ға дейін жұмыс істейді. Garage fest жәрмеңкесі – әлеуметтік жоба. Бүгін 50 кәсіпкер қатысып отыр. Олардың ішінде зейнеткерлер, жас кәсіпкерлер, мүмкіндігі шектеулі жандар бар. Мұнда олар ұлттық нақыштағы әшекейлерді, экосөмкелер, майшамдар және де басқа да бұйымдарды ұсынып отыр.
Жалпы EXPO аумағындағы жазғы сахнадағы концерттер әр демалыс сайын өтеді. Шара сағат кешкі 7-де басталады. Қай әртістің қай күні өнер көрсететіні QazExpoСongress ұлттық компаниясының әлеуметтік желілердегі парақшаларында жарияланады.
Авторлары: Риат Шони, Бағдат Қайыркенов.