Атырауда жаңа сауда ойын-сауық орталығы ашылды

Орталықта 8 кино залы, балаларға арналған екі парк және фитнес клубтар бар, деп хабарлайды 24kz.

Биыл облыс бойынша инвестициялық қаражат есебінен осындай 17 жоба қолға алынып отыр.

Бұл сауда ойын-сауық орталығында 100-ге тарта танымал шетелдік және отандық брендтер шоғырланған. Мұнда күніне 25 мың адам келеді деп жоспарланып отыр. Оларға бір мың адам қызмет көрсетеді. Ал, 2026 жылға қарай осындай тағы бір орталық пайдалануға берілмек.

Айнұр Буралкинова, сауда ойын-сауық орталығының бөлім басшысы:

- Ол кезде қосымша жұмыс орындарын ашамыз. Сонымен қатар бұрын батыс өңірде болмаған халықаралық, отандық сауда брендтерін Атырауға шақыруға мүмкіндік туады. Яғни, Алматы, Астанадағыдай батыста да тұтынушы талғамынан шығатындай қызмет түрін көрсетеміз.

Атырау облысында 100-ге жуық шетелдік бірлескен кәсіпорындар жұмыс істейді. Сондықтан халықаралық стандарттарға сай қызмет түрлері мен тауар ұсынатын компанияларды топтастыру кезек күттірмейтін іс. Биыл Атырауда осындай 17 ірі инвестициялық жоба қолға алынып отыр.

Полымбет Хасанов, облыстық кәсіпкерлік және өнеркәсіп басқармасының басшысы:

- Осы таяуда «Тексол Транс» деген жүк вагондарын шығаратын зауыт ашылған болатын, міне, екінші болып осы «Инфинити мол» сауда орталығы ашылып отыр. Инвестициялық жобаларды ашудың маңыздылығы, ол дегеніміз, Атырау өңірінде жаңа өндіріс орындарын ашуға мүмкіндік береді. Және жұмыс орындары ашылатыны белгілі.

Осындай тиімді инвестициялық орта қалыптасып келе жатқан Атырауда болашақта туризмді дамытуға арналған жобалар да жүзеге асырылады. Осы бағытта екі инвестициялық жоба қаралып жатыр

Авторлары: Арыстанбек Кенже, Айбек Байзақов, Жандос Рахметуллин