Студенттер мен мектеп оқушылары «El Umiti» білім гранттарына ие болды

Қомақты қаржылай жүлде үздік әлеуметтік жобалар жасаған балғындарға берілді, деп хабарлайды 24kz.

Еліміздің түкпір-түкпірінен жиналған жастардың ішінен оза шапқан өрендер туралы тілшіміз тарқатсын.

Серік Селеубайұлы, тілші:

- Астанада алғаш рет «El Umiti» премиясының финалы өтті. Қатысушылар екі кезеңнен тұратын іріктеуден өтіп, жеті бағыт бойынша түрлі оқу курстары мен байқауларға белсене қатысты. Сыннан сүрінбей өткен студенттер мен мектеп оқушылары әлеуметтік жобаларын ұсынды. Олар бірнеше ай бойы осы бағытта жұмыс істеп, зерттеулер жасаған. «El Umiti» корпоративтік қоры, осылайша, ел жастарының дамуына жол ашпақ.

Әсем Үсенова, жоба координаторы:

- Жоғарғы оқу орнына түссе, қатысушы немесе арнайы орта оқу орнына түссе, яғни, колледжге түсетін болса, бір жылдық оқуын төлеп береміз алған грантына. Мысалы ол спорттық халықаралық жарысқа қатысқысы келсе, тілдік курстарға қатысқысы келсе, яғни, соның алғашқы жарналарын төлеп береміз.

Премия жеңімпаздары қомақты білім гранттарына ие болды. Үшінші орынға 500 мың теңге тағайындалса, бас жүлде 2 млн теңге болды. Қазылар алқасы бұл сыйлыққа Семейден келген оқушылардың «BILi’mINNOVATION» әлеуметтік жобасын лайық деп тапты.

Ерасыл Жұмабай, «El Umiti» премиясының жеңімпазы:

- Жоба бойынша жоғары сынып оқушылары кіші сыныптарды олимпиадаға дайындау арқылы олардың облыстық немесе республикалық деңгейдегі пәндік олимпиадаларға дайындап, сол жерден орын алуына өз септіктерін тигізеді. Одан ары олар халықаралық олимпиадаларға шығуына да көптеген мүмкіндіктер бере алады.

Одан бөлек, ең белсенді қатысушыларға Зерендіде өткен «El Umiti-2024» жазғы білім беру лагеріне жолдама берілді. Ал жобаның келесі легіне тіркелу 15 қыркүйекте басталады.

Авторлары: Серік Селеубайұлы, Марат Диқанбаев