Абай облысында ауылдық мектептер заманауи талапқа сай жаңғыртылды
Абай облысында «Ауылдық аймақтардағы мектептердің әлеуетін арттыру» жобасы жүзеге асып жатыр.
Жоба аясында өңірде 7 мектеп заманауи жабдықтармен жасақталды. Әр ауданның бір мектебіне 250 миллион теңгеден бөлініп, олардың материалдық-техникалық базасы түгел жаңартылды. Жоба «Қазақстан халқына» қоры және Назарбаев Зияткерлік мектептерінің серіктестігі аясында іске асты.
Бородулиха ауданы Ә. Бөкейханов атындағы қазақ мектебінде 33 жаңа кабинет пайдалануға берілді. Дәл осындай жұмыстар Абай, Бесқарағай және Көкпекті аудандарында жасалды.
Рысқайша Дүйсенбаева, зейнеткер:
- Мектебіміз жаңарып жатыр. Бұрын да жаман емес еді мектебіміз, өте тәрбиелі ұстаздарымыз. Оқушыларымыз жағынан да ешқандай жамандық естігеніміз жоқ осы мектепте. Тек қана жақсылық болса екен деп ойлаймын.
Әр аудандағы мектептерде арнайы жабдықталған физика, химия, биология, информатика кабинеттері, қыздар мен ұлдарға арналған технология кабинеттері ашылды. Бұған қоса робототехника, ART-студия, STEM-зертхана және телестудия бар.
Жаннұр Мырзатай, 11-сынып оқушысы:
- Өзім бітіріп жатсам да, болашақтағы, қазіргі келе жатқан 1-сыныптар, 2-сыныптар, даярлық сыныптар осындай жақсы жабдықталған мектепте енді кіріп жатқанына өте қуаныштымын.
Абай облысында барлығы 309 мектеп бар. Өңірде 10 мыңнан астам бүлдіршін мектеп табалдырығын алғаш аттады. Биыл 5 мыңнан астам түлек алтын ұя мектебімен қоштасып, үлкен өмірге қадам басады.
Жасұлан Сәрсебаев, Абай облысы әкімінің орынбасары:
- Осы заманауи ілім алып, IT бағыты, басқа да болсын, ол білім саласы ғана емес, жалпы осы мектепті бітіргенде, өздеріңіз көргендей, қол шеберлігі болсын, басқа да сала болмасын, бала жан-жақты даму үшін барлық жағдай жасалған. Сондықтан осындай жобалар одан ары қарай да жалғасын табады.
2022 жылдан бері жоба аясында ауылдық мектептер заманауи талапқа сәйкес жабдықталып келеді. Биыл 7 мектептің материалдық-техникалық базасы толығымен жаңартылды. Бұған жалпы 1 млрд 750 млн қаржы бөлінді.
Авторлары: Рүстем Қайратұлы, Медет Өмірханов.