БҚО-дағы Рожков кен орны айына 6 мың тонна сұйытылған газ шығарады

Рожков кен орны толық жобалық қуатына көшті.

Кешен былтыр жыл соңында өнеркәсіптік пайдалануға берілген. Кеніштен қазір тәулігіне 1 миллион 370 мың текше метр тауарлы газ, 1 мың тоннадан астам конденсат өндіріледі, айына 6 мың тонна сұйытылған газ шығарылады. Бүгін «ҚазМұнайГаз» ұлттық компаниясының басқарма төрағасы Асхат Хасенов облысқа сапары барысында «Орал Ойл энд Газ» компаниясының өндірістік нысандарында болып, жұмыс процесімен танысты, келешекте өндіріс көлемін 1 млрд текше метрге жеткізуге қатысты міндеттер жүктеді.

Рожков кен орны облыс орталығынан 70 шақырым жерде, Бәйтерек ауданының аумағында орналасқан. Қазір кеніштегі ұңғымалар жоспарға сай іске қосылып, өндіріс толық жобалық қуатына көшті. Газ өңдеу зауыты айына 6 мың тонна сұйытылған көмірсутекті газ шығарады. «Осы арқылы сұйық отынмен өңірдің қажеттілігін өтеп қана қоймай, артығын өзге облыстарға жіберуге мүмкіндік бар», – дейді компания басшысы.

Асхат Хасенов, «ҚазМұнайГаз» ҰК» АҚ басқарма төрағасы:

- «КазМұнайГаз», венгрлік «Молл» және қытайлық «Синопек» компаниясы. Осы акционерлердің ортақ күш-жігері арқасында кен орны толық жобалық қуатына шықты. Сұйытылған газды бұрын Атыраудан әкелсек, енді жергілікті өніммен өңірді қамтамасыз етуге мүмкіндік бар. Тәулігіне 200 тонна сұйық отын шығады. Бұл – бірінші кезең. Біз бүгін әріптестермен әрі қарай даму мүмкіндіктерін талқыладық.

«ҚазМұнайГаз» өңірдің әлеуметтік мұң-мұқтажын да назардан шығарған емес. Бүгін компания Құрманғазы ауылындағы мектепке жаңа автобус сыйға тартты. Енді оқушылар сабаққа, түрлі шараларға, білім сайыстарына өз көліктерімен қауіпсіз жете алады.

Марина Вознесенская, Құрманғазы ауылының тұрғыны:

- Бұрын шағын автобус болды. Ішіне қолдан орындықтар қойып, амалдап жететін еді оқушылар. Енді, міне, мынадай жайлы көлікті тарту еткеніне қуаныштымыз.

Виолетта Служаева, оқушы:

- Мен Аманат ауылынан қатынап оқимын. Күн сайын ескі УАЗ көлігімен жететін едік. Жиі сынып қалатын, тар болатын. Енді арманымыз орындалды.

Құрманғазы негізгі мектебінде 41 бала білім алады. Оның 11-і көрші ауылдан қатынап оқиды.

Авторлары: Е.Жылқайдарұлы, Е. Меңдіғалиев, Э. Аюпов.