Атырауда халықаралық жастар форумы өтті

Атырауда «Saraishyq Upgrade» (Сарайшық апгрейд) халықаралық жастар форумы мәреге жетті.

Шараның мақсаты замана талабына сай креативті индустрияны дамыту, жастардың ортақ алаңын құру болатын. 2 күнге созылған шарада Ресей, Қырғызстан, Өзбекстан, Әзербайжан елдері мен Қазақстанның 8 өңірінен жиналған жастардың жобалары арасынан үздіктері мараптталды.

2 күнге созылған форум жиналғандар үшін нағыз мәртебелі мереке болды. Еліміздің 8 өңірі мен шетелдерден жиналған жас өрендер өзара пікір алмасып, ғылым мен өнердің әліппесімен танысты.

Гүлнұр Сүйеуова, облыстық ішкі саясат басқармасының басшысы:

- Осы кездесулер, осы өткен жобалар сіздерге үлкен мүмкіндік берді деген сенімдеміз. Аймақ басшысы өткен жылы бізге үлкен меже қойған болатын. «Saraishyq Upgrade» форумы дәстүрлі қылып өткізіңіздер, ауқымын кеңейтіңдер деп, сондықтан бірте-бірте осы межеге жетіп келе жатырмыз деп ойлаймын.

Форум аясы жыл санап кеңіп келеді. Биыл Өзбекстаннан 10 делегат келген болатын.

Атабек Мусулманов, форумға қатысушы /Өзбекстан/:

- Қазақ-өзбек бауырмыз. Атырауға алғаш келсек те көптеген жаңа достар таптық. Форум- достықтың, ғылым мен өнердің мерекесі болды. Өте керемет!

Халықаралық форумға 300-ден астам қабілетті жас қатысып, кинематография, музыка, маркетинг, театр, хореография және жасанды интеллект бағытындағы жобалар сарапқа салынған болатын. Соның ішінде хореаграфия бағыты бойынша Темірлан Әбіш үздік деп танылды. 

Темірлан Әбіш, форум жеңімпазы:

- «Saraishyq Upgrade-ке» мың алғыс. Оны ұйымдастырып жатқан Атыраудың әкімшілігіне көп рахмет айтамын. Болашақта өзім актерлік мамандыққа оқыған соң, бимен 3 жыл айналысқан соң екеуін де бірге ұстаймын деген ойдамын. 

Осылайша екінші мәрте ұйымдастырылған халықаралық форум мәреге жетті. 6 бағыт бойынша сарапқа салынған жүздеген жобаның үздіктері ақшалай және арнайы сертификатпен марапатталды.

Арыстанбек Кенже, Айбек Байзақов, Жандос Рахметуллин