Түркістан облысы Қаратөбе ауылында су электр станциясы салынып жатыр
Түркістан облысының Төле би ауданында шағын су электр станциясы салынып жатыр.
Қаратөбе ауылдық округінде іске асырылып жатқан жоба жүзеге асқанда жылына 18 млн КВТ тоқ өндіретін болады. Германияның технологиясы бойынша салынып жатқан су электр станциясының жұмысымен тілшіміз танысып қайтты.
Құрылысы биыл басталған шағын су электр станциясы Төңкеріс елді мекеніндегі Балдыберек өзенінің бойында бой көтеріп жатыр. Станцияға қажетті су көзі осы өзеннен алынады. Мамандардың айтуынша, мұнда 10 жергілікті, 6 армениялық маман жұмыс істеуде. Жоба жеке инвестордың қаржысына салынып жатыр.
Серік Бақашев, «Тау Энерго» ЖШС қызметкері:
- Қуаттылығы сағатына 3,2 МВт, жылына 18 млн КВт тоқ өндіреді. Жобалық құны 2 млрд теңге. Қазіргі таңда жұмыстардың 30%-ы атқарылды. Күн суығанға дейін бетондау жұмыстарын аяқтасақ, келесі жылы маусым айына дейін жұмыстарды толық бітіреміз.
Мамандардың айтуынша, әр үй орта есеппен күніне 200 КВТ электр энергиясын тұтынады десек, мұнда өндірілген қуат көзі 90 мың абонентке жетеді. Әрі неміс технологиясы қолданылмақ. Ең бастысы, ауыл тұрғындары электр тапшылығы болмайды деп қуанып отыр.
Болысбек Табылдиев, Төңкеріс ауылының тұрғыны:
- Елге арзан бағаменен электр қуатын береміз деп отыр. Бізге электр энергиясы өте қажет. Бүкіл еліміздегі электр энергиясының 1%-н өтесек те жаман емес деп ойлаймын. Бүкіл ел қуанып жатыр.
Асхат Райымбеков, аудандық кәсіпкерлік және ауыл шаруашылығы бөлімінің басшысы:
- Инвестициялық жоба жүзеге асқан кезде осы ауыл тұрғындарынан 10 адамды тұрақты жұмыспен қамтитын болады. Сонымен қатар әлеуметтік көмек есебінде осы ауылға бірқатар жобаларды жүзеге асыруды жоспарлауда. Оның ішінде балаларға арнап спорт кешенін салып беруді жоспарлап отыр.
Президент биылғы өз Жолдауында «Қазір әлемде энергия тапшылығы күшейіп барады. Елімізге сенімді және экологиялық таза қуат көздері аса қажет» деген болатын. Ал ауыл тұрғындары су электр станциясы өңірдегі өнеркәсіп саласындағы ілгері жобалардың біріне айналатынына сенеді.
Жандос Жұмабек, Ерболат Әбіш