Назым Қызайбай – Париж Олимпиадасының қола жүлдегері

Назым Қызайбай Париж Олимпиадасының қола жүлдегері атанды, деп хабарлайды 24KZ.

Қыздарының шаршы алаңдағы кездесуін ата-анасы мен жақындары көгілдір экраннан тамашалады. Жартылай финалда жұдырықтасқан жерлесімізге түн ортасында жұрт жұмыла қолдау көрсетті. Боксшымыз алғашқы екі кездесуде айқын басымдықпен жеңген болатын. Тек өткен түнде қытайлық қарсыласына есе жіберді. Әлемнің екі дүркін және Азия чемпионы атанған Назым Қызайбайдың ата-анасы: «Париж Олимпиадасынан алтын күткен едік», – дейді. Дегенмен жерлесіміз 50 келі салмақта қоланы місе тұтты.

Кәмшат Ахетқызы, Назым Қызайбайдың анасы:

- Өзінің арманы – Олимпиадаға бару. Енді бара салып жеңіліп қалса, жаман күйде болатын едік, Құдайға тәуба, қола жүлдегер болып жатыр. Мың да бір шүкір, осы қазағымыздың туын желбіретіп жүре берсін.