Астанада биологиядан халықаралық олимпиада басталды

Астанада IBO-2024 XXXV халықаралық олимпиада басталды, деп хабарлайды 24KZ.

Биология пәнінен өтіп жатқан зияткерлік байқау апта соңына дейін жалғасады. Ол әлемдегі үздік 7 пәндік олимпиаданың қатарында. Білім додасында 81 елден келген 500-ден аса оқушы мен мұғалім бақ сынайды. Сонымен қатар шара аясында қатысушыларға елорда мен Ақмола облысының көрікті жерлері таныстырылады. Еліміздің құрама командасы сайысқа 28 жыл қатарынан қатысып келеді. Осы уақыт аралығында отандастарымыз түрлі аталымдағы жетпістен астам марапатқа ие болған.

Ғани Бейсембаев, ҚР Оқу-ағарту министрі:

- Бұл Олимпиада 90-шы жылдары басталған болатын. Оған 6 мемлекеттен бастап қатыса бастаған. Биылғы деректер бойынша ең көп мемлекет осы Қазақстандағы олимпиадаға қатысып отыр. Биылдың өзінде 243-тен аса біздің жастарымыз, оқушыларымыз пән олимпиадаларынан үлкен жетістіктерге жетіп, еліміздегі білімнің жетістігін, ұстаздарымыздың жемісін көрсетіп жатыр деп айтуға болады.

Ғаждембек Тұрсынов, «Дарын» республикалық ғылыми-практикалық орталығының директоры:

- Бұл олимпиаданы өткізу үшін қазақтың жас ғалымдары бір жылдан аса уақыт кетірді. Осы олимпиаданың тапсырмаларын әзірлеу үшін. Барлық тапсырмалар экспертизадан өтті. Теориялық және практикалық 2 тур болады. Балалар 4 практикалық тапсырманы орындайды. Зертханалық жұмыстары бәрі дайын.