«Ессіз ғашық» фильмі экранға шықты

«Ессіз ғашық». Tiger Films продюсерлік компаниясы түсірген кинокартина осылай деп аталады.

Жанры романтикалық комедия.  Жаңа туындының премьерасы Алматыдағы Kinoplexx Saryаrka кинотеатрында өтті. Оған осы жобаға атсалысқан актерлер мен өнер иелері қатысты. 

Самат табысты жас кәсіпкер. Өркөкірек, тәкаппар. Барлық мәселені ақшамен шешіп алам,-деп ойлайды.

Ал Әсел болса  қарапайым отбасынан шыққан қыз. Даяшы болып жұмыс істейді.  Арманы танымал аспаз болу. Ол  тауда шаңғы теуіп келе жатып, Саматты қағып кетеді. Ал бейғам тұрған жігіт қатты соққыдан есінен айырылып қалады. «Ессіз ғашық» комедиясының сюжет желісі осы қыз бен жігіттің басынан кешкен оқиғаға құрылған.

Адина Бажан, актриса:

- Бұл романтикалық фильм. Бас кезінде екі жасты  ортақ ештеңе байланыстырмайды. Бір көргеннен ғашық та болмайды. Бірақ алғашқы кездесу ойламаған жерден екеуінің өмірін түбегейлі өзгертіп жібереді.

«Кинокартина табиғаты таңдай қақтырған Шымбұлақ шатқалында және Алматыда түсірілді. Бұл отандық туризмді насихаттауға септігін тигізбек»,- дейді фильм режиссері Оскар Бахтеев.

Оскар Бахтеев, режиссер:

- Ия біз ақылдаса келе фильмді Шымбұлақта түсіруге келістік. Қазақстанның көрікті жерлерін басқаларға көрсеткіміз келді. Ал, киноның желісі өте қарапайым. Әдеттегідей отбасы құндылығы мен кісі бойындағы адамгершілік,қайырымдылық, махаббат сияқты ең асыл қасиеттердің маңызды екенін көрсеткіміз келді.

 «Ессіз ғашық»  Tiger films продюсерлік компаниясы түсірген 14-ші фильм. Бүгінннен бастап барлық кинотеатрларда көрсетіле бастайды. Киноның немен аяқталатынын білгіңіз келсе көруге асығыңыз.

Авторлары: Қарлығаш Қайыпбекова, Валентин Лобанов