Астанадағы әскери колледж ұландарды қабылдайды

Астанадағы Сағадат Нұрмағамбетов атындағы әскери колледж ұландарды қабылдауға дайындығын бастап кетті, деп хабарлайды «Хабар 24».

9-сынып бітірген талапкерлер құжаттарын тамыздың 1-нен 5-не дейін тапсыра алады. Әскери колледжге түсудің шарттары қандай?

Нұрлыбай Нұрәлиев – Сағадат Нұрмағамбетов атындағы әскери колледждің 1-курс ұланы. Әкесі де әскери салада қызмет етеді. Нұрлыбай да оның жолын қуып, Отанын қорғағысы келеді. Сондықтан колледжге түсу үшін бір жылдай тыңғылықты дайындалған. Оқу үлгерімімен қатар дене шынықтыру және психологиялық дайындық кезінде ата-анасы қолдау көрсеткен.

Нұрлыбай Нұрәлиев, С. Нұрмағамбетов атындағы әскери колледж ұланы:

- Егер де жүректеріңіз осы саланы қаласа, сіздерге міндетті түрде осы әскери салаға келу керек деп ойлаймын. Себебі бұл өздеріңізге ғана емес, сонымен қатар толықтай елді қамтитын саланың бірі болып келеді. Яғни, сіздер өздеріңіздің материалдық жақтан ғана емес, рухани сонымен қатар ер екеніңізді дәлелдейсіздер.

Колледжді сержант дәрежесінде бітірген соң, Нұрлыбай білімін әрі қарай жоғары әскери оқу орындарында жалғастырмақ. Жалпы Нұрлыбай сияқты әскери колледжге жыл сайын 400-ден астам талапкер құжат тапсырады. Тек іріктеуден өткендері осында тегін оқу мүмкіндігіне ие болады.

Жанар Ермағамбетова, жалпы білім беру пәндері циклінің бастығы:

- 4 кезеңнің бірінші кезеңі – кәсіби психологиялық іріктеу, екінші кезең, әскери медициналық сараптама жүргізуі қағидасына сәйкес медициналық тексеруден өтеді. Үшінші кезең, дене шынықтырудан өтеді. Төртініші кезең  – конкурстық іріктеу және оқуға қабылдау. Жылына негізі 140 студент қабылдаймыз.

Құжаттарды қабылдау тамыздың 1-і мен 5-і аралығында жүргізіледі. Ал конкурстық қабылдауды арнайы комиссия тамыздың 20-да өткізеді. Қабылдау комиссиясының шешімі 21 тамызда жарияланады. 

Авторлары: Бақыт Топтаева, Нұрғали Мамурбаев.