«WorldSkills Kazakhstan 2023» сайысының жеңімпаздары марапатталды

«Робототехника және электроника», «Бастауыш білім беру», «Әрлеу мен плита жапсыру».

Елордада өткен WorldSkills Kazakhstan 2023 республикалық чемпионатында Түркістан облысының командасы жоғары нәтиже көрсетті. Білім додасынан жеңіспен оралған колледж студенттеріне облыс басшылығы құрмет көрсетіп, сый-сияпат жасады.  

Сайыста облыс намысын 30 студенттен құралған топ 29 құзыреттілік бойынша қорғады. «Бастауыш білім беру» бағытында Балнұр Жексенбекқызы жеңімпаз атанды. Ол чемпионаттың қиын әрі қызықты болғанын айтады.

Балнұр Жексенбекқызы, WORLDSKILLS KAZAKHSTAN 2023 чемпионатының жеңімпазы:

- Әр күні әртүрлі модульдер өткіздік. Олар бізге оңай болған жоқ. Қанша дайындалдық. Ұрыста естідік, жылап та алған кездеріміз болды. Соның арқасында осындай жоғары нәтижеге жеттім.

Ал Сайрам ауданындағы кәсіптік колледж студенті Бекзат Розақұлов "Плита жапсыру" құзыреттілігі бойынша жеңіске жетті. Жарысқа қатысушылар 400 шаршы метр жерге үш модульмен кафель жапсырған.

Мырзайым Әбдіназаров, Сайрам ауданындағы кәсіптік колледж мұғалімі:

- Басқа балалар сызуды алып, кафельді жерге қойып алып, сызып шығарып жатса, біздің бала миға барлығын жаттап алған. Сол жағынан уақыт көп үнемдедік. Бір модульге 8 сағат берілсе, біздің бала 6 сағатта бітіріп отырды. Сарапшылардың барлығы бір ауыздан келісіп, бізді бірінші орынға шығарды.

Республикалық білім бәсекесінде түркістандық өрендер 2 алтын, 3 күміс, 1 қола және 9 ерекше медальға қол жеткізді. Облыс әкімінің орынбасары Бейсенбай Дәулетұлы жеңімпаздар мен жүлдегерлерге 100 мың теңгенің сертификатын табыстады.

Білім додасында техникалық және кәсіптік, орта білімнен кейінгі білім беру ұйымдарының студенттері 9-орыннан 7-орынға көтерілді. Жарыс жеңімпаздары енді келер жылы Францияда өтетін әлемдік білім сайысында ел намысын қорғайды.

Авторлары: Жандос Жұмабек, Ерболат Әбіш