Бразилияда су тасқынынан бес адам қаза тапты
Бразилияның Петрополис тарихи қаласында толассыз жауған нөсер соңы тасқынға ұласып, бес адам ажал құшты, деп хабарлайды «Хабар 24».
Тағы төртеуі із-түзсіз жоғалып кеткен. Іздеу-құтқару жалғасты. Операция нәтижесіз емес, 31 тұрғын аман-есен табылды. Бұл жұмысқа иісшіл иттер мен дрондар да жұмылдырылған. Лай көшкіні жүруі мүмкін деген 60-тан астам қауіпті аумақ айқындалды. 15 ақпанда Петрополис қаласында 6 сағат ішінде жауын-шашынның 1 айлық мөлшері түсіп, 233 адам көз жұмған болатын.
Фабио Контрейрас, құтқарушы:
- 12 сағат ішінде 400 миллиметр жауын-шашын түсті. Қала қайтадан табиғи апат құрсауында қалды. 180 өрт сөндіруші тартылды. Қызу жұмыс болып жатыр.
Изабел Карвало, жергілікті тұрғын:
- Ағам Марио ұшты-күйлі жоғалып кетті. Шарқ ұрып іздеп жатырмыз. Тасқын басталған бетте ол досына мүгедек анасын көшірісуге кеткен. Содан бері олардан хабар жоқ.
АҚШ-тағы Техас штатының солтүстігінде дауыл соғып, найзағай түсіп, 4 адам жарақат алды. Сондай-ақ күшті жел бірнеше үй мен ғимараттың шатырын ұшырып әкеткен. Жануарларға күтім жасалатын орталыққа да зақым келді. Билік алдағы уақытта торнадо соғуы мүмкін деп ескертті.
Бред Борнет, мектеп директоры:
- Дауыл 2 кампусымыз - бастауыш және орта мектеп ғимараттарына зақым келтірді. Шатыры ұшып, қабарғалары қирап қалды. Абырой болғанда, оқушыларымын мен қызметкерлерге зияны тиген жоқ. Сабақтарды кейінге шегердік. Мектептің қашан ашылатыны әзірге белгісіз.