Вашингтондағы тұрғын қазақ тілін балаларға үйретудің тәсілін ойлап тапты

Вашингтонда тұратын 5-ші сынып оқушысы қазақ тілін балаларға үйретудің тың тәсілін ойлап тапты.

Енді смартфонға байланып, ойынның қызығына кіріп кететін бүлдіршіндер қазақша тапсырмалар шешіп, жаңа сөздер жаттай алады. Жалпы АҚШ-та тұратын қазақтар үшін ана тілін ұмытпау өзекті мәселе. Баласының қазақша сөйлеуіне ата-аналар да мүдделі болғандықтан жыл сайын тілдік курстарға сұраныс та артып келеді. Вашингтон қаласында екі бірдей тіл курсы жұмыс істейді. 

Қазақстан елшілігі өзге штаттардан түскен өтініштерді ескере отырып, «Отандастар» қорымен бірлесіп, онлайн форматта қазақ тілін үйрету мәселесін пысықтап жатыр.

Иманғали Бектұрсын АҚШ-қа былтыр күзде келген. 500 ғалым жобасы бойынша тағылымдамадан өтіп жатқан анасы Жазира Сайын, сенбі сайын Америкадағы балаларға қазақша үйретеді. Ол құрдастары мен іні-қарындастарының қазақшаға шорқақ екенін күнде көріп жүр. Бір жағынан анасына көмектескісі келіп, екінші жағынан ойын арқылы тілді оңай меңгеруге болатынын түсінеді. Сөйтіп Roblox-та қарапайым тапсырмалар жасайды. 

Иманғали Бектұрсын, 5-сынып оқушысы:

- Ол сондай ойын платформасы, қалаған адам өзі ойын істеп сол платформаға сала алады.

Балалар арасында өте танымал Roblox платформасының мүмкіндігі мол.

Кез-келген пайдаланушы өзінің ойынын құрастырып, виртуалды әлемде түрлі тапсырма орындай алады. Мета кеңістікте өзара кездесіп, сауда жасап, үй жануарларын асырап, түрлі маман иесі сияқты жұмысқа да баруға болады. Міне осы жерде енді қазақша тапсырмалар орындап, дұрыс жауаптарын тапқан соң келесі кезеңге өтесің.

Иманғали Бектұрсын, 5-сынып оқушысы:

- Жазылып тұр ағылшынша. Қазақша тауық қалай болады? Мында таңдау бар. Бақа немесе тауық. Бақаға кірсе ойын қайта басталады. Тауыққа кірсем ойын жалғаса береді.

Қазақ тілі клубына келіп жүрген бүлдіршіндердің көбі шет елде дүниеге келген. Сабақ барысында өздерін таныстырған балалардың бірі - Лондонда, енді бірі Малайзияда, Монғолияда туған. Дипломат ата-ана, баласының ана тілін құрметтейтін азамат болып өскенін қалайды. Сондықтан сенбі сайын ешкім сабақтан қалмайды.  

Жазира Сайын, ДЖ. Вашингтон университетінде тағылымдамадан өтуші:

- Қазақи ортасы жоқ, әрине оларға  қазақ тілін үйрену қиын. Сондықтан осындай іс-шара ұйымдастырып, АҚШ-тағы елшілік осындай жоба қазақ тілі клубын ашып бізді еріктілерді тартып жинап жатқаны ол жақсы бастама.

Жазира Сайын, АҚШ-та сабақ оқу үшін мектепке қуана баратын бүлдіршіндер қазақша клубқа да өз еріктерімен, жайдары көңіл-күймен келгенін қалайды. Сол үшін тапсырманы үйіп-төкпей, еркін форматта, ойын түрінде өткізеді. Басты міндет – әр баланың көкейіне қазақ еліне деген сүйіспеншік қалыптастырып, ертеден ана тілін сіңіру.