Түркияда ақ нөсерден тас жол опырылып түсті

Түркияда ақ нөсер салдарынан туннельге апаратын жолдың бір бөлігі опырылып, ойылып түсті.

Мұны куәгерлер түсіріп алған видеодан анық көруге болады. Оқиғадан ешкім зардап шеккен жоқ. Қазір жол,,, жөндеу жұмыстарына жабылды. Естеріңізге сала кетейін, бірнеше күн бойы Түркияның Қара теңіз жағалауында жаңбыр жауды. Ауа-райының қолайсыздығынан көлік апаты жиіледі. Көшелер мен үйлер су астында қалып, кей аудандарда тас жолдар жабылды.

Грузияда 30 мыңнан астам тұрғын сусыз қалды

Ал Батыс Грузияда су тасқынынан құбырлар істен шығып, 30 мыңнан астам адам ауыз сусыз қалды. Арнасынан тасыған өзен газ құбырына зақым келтірген. Салдарынан, бірнеше қалада көгілдір отын да сөнді. Қатты жаңбырдан ауылшаруашылық алқаптары су астында қалды. Жергілікті билік тұрғындардан үйде қалуды сұрайды. Жұлынып, ұшып кеткен ғимараттардың шатыры, жолдар мен электр желілерін қалпына келтіру жұмыстары жүргізіліп жатыр.