Қазақстандық кәсіпкер Корея Республикасы Президентінің сыйлығына ие болды

Жүлдені Президент Юн Сок Ёль атынан Дмитрий Лиге Инчхон қаласының мэрі табыстады.

Жерлесіміз басқарып отырған компания бір жыл ішінде 30 миллион долларға тауар экспорттап, жергілікті биліктің ерекше ықыласына бөленген. Дмитрий Ли Қазақстаннан Оңтүстік Кореяға 2019-шы жылы көшіп барған. Бастапқыда жүргізуші болып жұмыс істеп, кейін көлік экспортымен айналысатын компания құрған. Кореяға көшкенге дейін жерлесіміз еліміздің бұқаралық ақпарат құралдарында жұмыс істеген. «KAZAKH-TV» арнасында ағылшын тілінде жаңалықтарды жүргізді.

Сим Джун Сок, Корея сауда қауымдастығының Инчхон орталығы директоры:

- Бұл сыйлықтың иегерлері Корея экономикасына қомақты үлес қосты. Біз экспорттаушыларды жергілікті және шетелдік деп бөлмейміз. Жүлде кем дегенде 1 миллион долларға кореялық тауарларды экспорттаған бизнесмендерге беріледі.

Дмитрий Ли, автокөлік экспорттаушы компанияның басшысы:

- Әрине, мұнда жергілікті кәсіпкерлермен салыстырғанда, бізге, шетелдіктерге әлдеқайда қиын. Өйткені тіл мен заңнаманы жақсы біле бермейсің. Мұның бәрін зерттеуге көп уақыт қажет. Бірақ маған бірнеше шет тілді, оның ішінде ағылшын мен орыс тілін жетік білетінім көп көмектесті. Әсіресе шетелдік сатып алушылармен кездесіп, байланыс орнатуыма септігін тигізді.